პლასტიკური ოპერაციების ბუმია მთელ მსოფლიოში, მაგრამ ყოველთვის არ ამართლებს პლასტიკური ქირურგის მიერ ჩატარებული ოპერაცია და ადამიანები უბრალოდ მსხვერპლად იქცევიან ხოლმე წარუმატებელი ოპერაციის შედეგად, რისი გამოსწორებაც უკვე ძნელია.
ჩვენ, პლასტიკური ქირურგიის შედეგად დაზარალებულ პაციენტ მანანა გრატიაშვილის შესახებ მოგიყვევით, რომელმაც თავისი უარყოფითი გამოცდილების შესახებ ისაუბრა და ექიმი ციცინო შურღაია არაპროფესიონალიზმში დაადანაშაულა.
– წლებია, იტალიაში ვცხოვრობ, თუმცა საქართველოსთან კავშირი არასოდეს გამიწყვიტავს. დაახლოებით 7 თვის წინ გავიგე, რომ ცნობილი პლასტიკური ქირურგი, ციცინო შურღაია, რომელიც რუსეთში მოღვაწეობდა, საქართველოში დაბრუნდა. დიდხანს არ მიფიქრია და გადავწყვიტე მასთან ბლეფაროპლასტიკა ჩამეტარებინა. ეს უმარტივესი ოპერაციაა და თვალის ქუთუთოს მოშვებული კანის მოჭრას და კორექციას გულისხმობს. ოპერაცია 5 თვის წინ, 21 ოქტომბერს ანესთეზიით გავიკეთე და მეორე დღეს კლინიკიდან გამწერეს, მაგრამ პროცესი თავიდანვე ძალიან რთულად განვითარდა. ჭრილობა შემიშუპდა, სიცხე მომცა და თავს ცუდად ვგრძნობდი, მაგრამ ქალბატონმა ციცინომ რამდენჯერმე სითხე ამომიღო და დამამშვიდა – ანთებითი პროცესია და მალე ჩაცხრებაო. 29 ოქტომბერს ნაკერები ამომიღეს და დაიმედებული, რომ ყველაფერი წესრიგშია, 30 ოქტომბერს იტალიაში დავბრუნდი და იქიდან ვეკონტაქტებოდი, მაგრამ დროთა განმავლობაში, მდგომარეობა გაუარესდა. არასწორი განაკვეთის გამო კუნთები დაზიანდა, ქუთუთოები ფაქტობრივად, ამობრუნებულია და საშინელი ასიმეტრიაა. სისხლის მიმოქცევა დაირღვა და სახეზე ნეკროზი განვითარდა, რისი ფოტოებიც თან მაქვს. იტალიელმა ექიმებმა მკვდარი უჯრედები მომაცილეს, ანტიბიოტიკებით და მალამოებით მიმკურნალეს და სიცოცხლე და მხედველობა გადამირჩინეს, თუმცა პროცესი დამთავრებული არ არის. კიდევ ორი ოპერაციაა საჭირო იმისთვის, რომ სახე აღვიდგინო. აქ საუბარი აღარ არის სილამაზეზე. არასწორი განაკვეთების გამო სახე მთლიანად განადგურებულია და სარკეში ჩახედვაც კი მიჭირს.
როგორც პაციენტი აცხადებს, შესაძლოა ექიმს უნებლიე შეცდომა მოუვიდა, თუმცა აუცილებელია ეს აღიაროს და შესაბამისი ყურადღებაც გამოიჩინოს. საქართველოში დაბრუნების შემდეგ სწორედ ამის იმედი ჰქონდა მას, რომელიც არ გაუმართლდა. ასევე აღნიშნავს, რომ ფოტოები რომელიც ოპერაციამდეა გადაღებული და გავრცელდა, კბილების ინპლატაციის შემდეგ მეორე დღეს არის გადაღებული, ამიტომ სახე თავისთავად შეშუპებული იყო.
საქართველოში თებერვალში დავბრუნდი და რა თქმა უნდა, ციცინო შურღაიას დავუკავშირდი. მისი პასუხიდან გამომდინარე, ვასკვნი, რომ საერთოდ ვერ ხვდება, რაში შეცდა. მისი თქმით, ყველაფერი სწორად გააკეთა და თუ რამე არ მოგვწონს, სასამართლოს უნდა მივმართოთ. რა თქმა უნდა, ასეც მოვიქეცი – სასამართლოსაც მივმართე, ჯანდაცვის სამინისტროსაც და პროკურატურასაც, რომ მოკვლევა დაიწყოს. პირველ რიგში, მინდა, რომ ჩემი გამოცდილება სხვა ადამიანებისთვის მაგალითად იქცეს, რომ აღარავინ დაზარალდეს. სწორედ ამიტომ გადავწყვიტე ამაზე ხმამაღლა საუბარი. ამასთან, რა თქმა უნდა, ოპერაციის ღირებულების უკან დაბრუნებას და იტალიაში ჩატარებული მკურნალობის ანაზღაურებას ვითხოვ. დამატებით ორი, საკმაოდ ძვირადღირებული ოპერაციაა ჩასატარებელი და ესეც უნდა აანაზღაუროს. იცით რა შემომთავაზა? მე კი არაფერი შემშლია, მაგრამ თუ გინდა, განმეორებით ოპერაციას ჩაგიტარებ და ცოტა კიდევ გაგალამაზებო. ისეთი პოზიცია აქვს, თითქოს მასთან შრეკის ცოლი, ფიონა მივიდა და უკეთესი ვარიანტი არ გამოვიდა. რა თქმა უნდა, ამ ქალბატონთან საოპერაციო მაგიდაზე მეორედ აღარ დავწვები და არც სხვებს ვურჩევ – განაცხადა მანანა გრატიაშვილმა.
ბუნებრივია, მომხდართან დაკავშირებით, ციცინო შურღაიას პოზიციაც საინტერესოა, რომელიც თავს დამნაშავედ არ თვლის და აცხადებს, რომ მან ყველაფერი სწორად გააკეთა.
,,შეხორცების პროცესი წავიდა, რადგან იყო მწეველობა და დაშლილი ფილერი. იმდენად დიდი გამოცდილება მაქვს, რომ კუნთი შეუძლებელია დავაზიანო, გამორიცხულია. როგორც არ უნდა შეხორცდეს და რა საშინელიც არ უნდა იყოს, გავასწორებ-მეთქი. მადლობაო, მომწერა. ჩემთვის გამოუსწორებელი მდგომარეობა არ არსებობს. როდესაც ადამიანს არ ესმის, საერთოდ ვერ იგებს ვერაფერს, ვეუბნები, წადი სასამართლოში. ექსპერტიზა დაადგენს ყველაფერს”, – თქვა ციცინო შურღაიამ.
