საქართველოს ნაკრები ევროპის ჩემპიონატისთვის მზადებას განაგრძობს
საქართველოს ნაკრები ევროპის ჩემპინატისთვის მზადებას გერმანიაში აგრძელებს. საქართველოს ნაკრების მეკარემ, გიორგი მამარდაშვილმა მედიასთან კომენტარი გააკეთა, სადაც მოსამზადებელ ეტაპსა და ევროპის ჩემპიონატის მოახლოებულ სადებიუტო მატჩზე ისაუბრა:
საბრძოლო განწყობა გვაქვს და მთელი შემართებით ვემზადებით. ჩვენთვის ეს პირველი ევროპის ჩემპიონატია. საკმაოდ რთული თამაშები იქნება, მაგრამ ამ თამაშებში სასურველი შედეგის დაფიქსირება შეუძლებელი არ არის.
ყველანაირად კარგი პირობები გვაქვს. საწვრთნელი პროცესიც კარგად მიდის და ვცდილობთ, რომ კიდევ უფრო დავიხვეწოთ.
მიმაჩნია, რომ ყველასთან თამაში შეიძლება. რაც შეეხება თურქეთთან მატჩს, რა თქმა უნდა, რთული თამაში გველის და როგორც პირველ შეხვედრას, თავისი წნეხი და დაძაბულობა ახლავს. სტადიონზე მათ ბევრი თურქი ქომაგი ეყოლებათ, მაგრამ ამ მხრივ არც ქართველები დააკლებენ. დაძაბულ თამაშს ველი და ვფიქრობ, დიდი შანსია ბედი ერთმა ბურთმა გადაწყვიტოს.
ყველაფერს გავაკეთებთ იმისათვის, რომ ქართველი ხალხი კიდევ ერთხელ გავახაროთ. მინდა მადლობა გადავუხადო იმ ქართველ გულშემატკივრებს, რომლებიც ჩვენს ღია ვარჯიშს დაესწრნენ. ამ ვარჯიშმა დიდი ენერგია მოგვცა.
ყოველდღიურად თითოეული ფეხბურთელი ჩვენი ქომაგისაგან დიდ მხარდაჭერას ვგრძნობთ. მადლობას ვუხდი თითოეულ ქართველს იმისათვის, რომ მთელი გულით გვგულშემატკივრობს და აუცილებლად ვეცდებით, რომ კვლავ გავახაროთ და ჯგუფიდან გავიდეთ.
მათი გულშემატკივრების სიმრავლის არ მეშინია, რადგან ჩემთვის ერთი ქართველი 20 თურქს უდრის, ამიტომ არ მეშინია.
