კულტურა ეს საძირკველია, რომელიც დღევანდელ ეპოქამდე მტკიცდება, მაგრდება და შემდეგ ამ საძირკველზე შენდება მსოფლიოს სახელმწიფოები. სახელმწიფოებს გამოარჩევს კულტურა, ისევე როგორც შენობას საძირკვლის სიმდგრადე. საქართველოში მრავალი ხელოვანი ცხოვრობს, რომლებიც თანამედროვე ეპოქის საძირკველს ამაგრებენ, მაგრამ მათი დაფასება და წარმოჩინება ხშირად ავიწყდებათ. ჩვენი მიზანი სწორედ ამ ნიჭიერების, კულტურის სხვადასხვა სფეროს წარმომადგენელთა გაცნობაა, რომლებიც ცხოვრობენ აწმყოში და ქმნიან მომავალს, რომლის სრულყოფაც სწორედ მათზეა დამოკიდებული, რადგან ისინი ქმნიან ხელოვნებას, მაშასადამე კულტურას. ამ მხრივ მხატვრები მეტად დაუფასებლები არიან და მოკლებულნი საზოგადოების უდიდესი ნაწილის ყურადღებას.,,თბილისი თაიმსი“ აგრძელებს ფართო საზოგადოებისთვის ხელოვანთა წარდგენას. ამჯერად კი ჩვენ გთავაზობთ ძალიან ნიჭიერ და გამორჩეულ ხელოვანს, მხატვარს ლალი დანილუკს.
მოგვიყევით თქვენს შესახებ, როდის აღმოაჩინეთ თქვენი ნიჭი და რა ასაკში დაიწყეთ ხატვა ?
დავიბადე ქალაქ ბათუმში 1979 წელს. ჩემში ხატვის ნიჭი აღმოაჩინა ბაღის პედაგოგმა. შემდეგ მან უამბო ამის შესახებ დედაჩემს, რომ მიეხედათ ჩემთვის, რადგან საკმაოდ კარგად ვხატავდი, თუმცა მე დიდად არ ვიყავი დაინტერესებული ხატვით და სხვა ბავშვური გატაცებები მქონდა. მაგრამ 10 წლის ასაკში მაინც ჩავაბარე სამხატვრო სკოლაში. მოტყუებით მიმიყვანეს გამოცდაზე და გავჯიუტდი, მაგრამ მაინც დავხატე და მაღალი ქულის მიღებით მომეცა სტიმული, რომ გამეგრძელებინა ხატვა. შემდეგ სამხატვრო სკოლის დამთავრებას მოჰყვა სამხატვრო სასწავლებელი და ხელოვნების ინსტიტუტი.
თქვენი გვარი – დანილუკი, ფსევდონიმია? საიდან მოდის?
არა დანილუკი არ არის ფსევდონიმი, ეს ჩემი გვარია ეროვნებით უკრაინელი ვარ.
რომელ ჟარნრში მუშაობთ?
მე დღემდე ძიების პროცესში ვარ, რადგან ხელოვნებას არ აქვს საზღვრები. ხოლო რაც შეეხება ჩემს სტილს ის რამდენიმე მიმართულებას შეიცავს და მაინც იკვრება ეგზისტენციალიზმში, რაც არსებობის ფილოსოფიას ნიშნავს.
ამჟამად რა ნამუშევარზე მუშაობთ ?
ამ ეტაპზე რამდენიმე ნამუშევარზე ვმუშაობ, რადგან ჩემთვის მეტად კომფორტულია ჩემი გონება იყოს ინფორმაციულად დატვირთული და ძიების პროცესში, პოულობდეს გამოსავალს ან ჩიხს სიუჟეტზე, რომლის განვითარება საჭიროებს განწყობას.
რამდენი გამოფენა გაქვთ ჩატარებული და სად?
სამი პერსონალური გამოფენა მქონდა 2005 და 2010 წლებში ქალაქ თბილისში და 2007 წელს ქალაქ ბათუმში. აგრეთვე მივიღე მონაწილეობა, რამდენიმე ჯგუფურ გამოფენაში საქართველოს სხვადასხვა ქალაქში.
ხატვის გარდა რა საქმიანობით ხართ დაკავებული?
ამ ეტაპზე დაკავებული ვარ მხოლოდ ხატვით და გამოფენისათვის მზადებით.
რა ინდივიდუალური ნიშნით გამოირჩევა თქვენი ნახატები?
გამოირჩევა რასაკვირველია ფერით. სწორედ ესაა განწყობის და გულწრფელობის მანიშნებელი ჩემს შემოქმედებაში. ის ძალიან მნიშვნელოვანია ჩემს ნახატებში.
სულ რამდენი ნამუშევარი გაქვთ შექმნილი? და მათგან რომელია თქვენთვის ყველაზე საყვარელი?
ზუსტად არ ვიცი რამდენი ნამუშევარი შემიქმნია. არ დამითვლია ის ხომ ინდივიდუალურია და დასრულების შემდეგ ცალკე ორგანიზმია. მე მხოლოდ შექმნის პროცესში ვარ მათთან ახლოს, შემდეგ მათ თავისი ისტორია აქვთ და თავის სივრცის ძიებაშია. თუმცა არის ერთი ნამუშევარი, რომელიც ჩემთვის ძალიან მნიშვნელოვანია. მასზე არის ასახული ჩემი განწყობა, სევდა იმ პერიოდის რომელშიც დაბრუნება არასოდეს არ მინდა და არც არასდროს დავბრუნდები.
ვინ არის თქვენთვის იდეალი მხატვრობაში? რატომ?
მიქელანჯელო არის ჩემი იდეალი. მასში ხელოვნებამ მიაღწია იდეალურ განვითარებას, რაც ძალიან მნიშვნელოვანია ხელოვანისათვის.
როგორ ახდენთ თქვენი ნახატების რეალიზაციას ან სად არის შესაძლებელი მათი ნახვა და შეძენა?
ნამუშევრების ნახვა შესაძლებელია ჩემს პირად ვებ-საიტზე და აგრეთვე სოციალურ ქსელ ,,ფეისბუქის“ გვერდზე, ამასთანავე სახელოსნოში. ყოველთვის ვცდილობ პირადად ვიცნობდე ადამიანებს, ვინც ყიდულობენ ჩემს ნამუშევრებს, უმეტესად კი უცხოელები ყიდულობენ.
როგორ დაიმკვიდრეთ თავი მხატვრობაში? თუ გაქვთ რაიმე განსაკუთრებული გზა რასაც მიყვებით?
მე ვაკეთებ იმას რასაც უნდა ვაკეთებდე და ვცდილობ ხელოვნებაში ვიყო გულწრფელი.
როდის გეგმავთ გამოფენას ან საზღვარგარეთ ხომ არ აპირებთ საქმიანობის გაგრძელებას?
გამოფენას ვგეგმავ ზაფხულში, რაზეც უკვე ვმუშაობ. სამომავლო გეგმები რა თქმა უნდა არის კავშირში საზღვარსგარეთ სწავლის და მუშაობის გაგრძელებასთან, მაგრამ ამ ეტაპზე საიდუმლოდ დავტოვოთ.
რა რჩევას მისცემდით დამწყებ მხატვარებს? არის თუ არა საქართველოში ისეთი გარემო, რომ ახალგაზრდა ან დამწყებმა მხატვრებმა რეალიზაცია მარტივად შეძლონ?
მე, როგორ მივცე რჩევა ხელოვანებს, თავად ვარ დამწყები ხელოვანი, უბრალოდ ვეტყვი, რომ აკეთონ ის რასაც გრძნობენ და იარონ იმ გზით, რომელიც მათთვის მართებულია. აგრეთვე ბევრი ინფორმაცია მიიღონ ხელოვნების შესახებ. საქართველოში ფაქტობრივად არ არსებობს ბაზარი, ამიტომ წარმოუდგენელია აქ ნამუშევრების რეალიზაცია.
როგორი პოლიტიკა უნდა გაატაროს სახელმწიფომ ხელოვნების ხელშეწყობისა და განვითარებისთვის?
ჯერ უნდა გაახსენდეთ, რომ ამ ქვეყანაში არსებობს ხელოვნება და უნიჭიერესი ხელოვანები და არა ფსევდო, უნიჭო შარლატანები. მხოლოდ შემდეგ იქნება მსჯელობა ხელოვნების განვითარებისათვის.
და ბოლოს, თქვენი პიროვნებიდან გამომდინარე, ჩამოგვითვალეთ 10 ღირებულება და ფასეულობა, რომლებიც თქვენთვის ყველაზე მნიშვნელოვანია.
ესაა პატიოსნება, შინაგანი კულტურა, ინდივიდუალიზმი, გულწრფელობა, თავშეკავებულობა, სიკეთე, პასუხისმგებლობა, სიყვარული, თავგანწირვა, მეგობრობა.
07.01.14
გიორგი ჩუბინიძე
