„ოცნების ქალაქში“ 582 ოჯახის შესახლების პროცესი დაიწყო, – ინფორმაციას ამის შესახებ აჭარის მთავრობის პრესსამსახური ავრცელებს.
“აჭარის მთავრობის თავმჯდომარის დაპირებისამებრ, ოცნების ქალაქის პირველი მობინადრეები ძმები, ანრი და კახა ბერიძეები გახდნენ. დღეს ოცნების ქალაქში 30-მდე ოჯახს გადაეცა გასაღები და ახალაშენებულ კომპლექსში შესახლდა. შესახლების პროცესი ყოველდღიურ რეჟიმში გაგრძელდება.
პირველ ეტაპზე ბინები სპეციალური კომისიის მიერ შემუშავებული კრიტერიუმებით შერჩეულ ოჯახებზე გადანაწილდა. შესახლების პროცესი დოკუმენტაციის წარდგენისა და შესაბამისი პროცედურების გავლის შემდგომ დაიწყო.
ე.წ ოცნების ქალაქში 582 ოჯახზე გათვლილი სამი 12 სართულიანი მრავალბინიანი საცხოვრებელი აშენდა. პროექტის მეორე ეტაპის განხორციელება უკვე დაწყებულია. პროექტის ახალი ეტაპი მთლიანი ტერიტორიის დაგეგმარებას, სწორ ურბანულ განვითარებას, საგანმანათლებლო, საცხოვრებელი და რეკრეაციული სივრცეების შექმნას გულისხმობს.
ოცნების ქალაქი არის ერთ-ერთი მასშტაბური უპრეცედენტო სოციალური პროექტი, რომლის განხორციელების გადაწყვეტილებაც აქ მცხოვრები 1600-ზე მეტი ოჯახის მძიმე სოციალური პირობების გათვალისწინებით იქნა მიღებული.
მოსახლეობას ბინები აჭარის ჯანდაცვის მინისტრის მოადგილე ედუარდ ნაკაშიძემ და ბათუმის საკრებულოს თავმჯდომარე რამაზ ჯინჭარაძემ გადასცეს”, – ნათქვამია ინფორმაციაში.
