ბუდაპეშტში დედაენის დღის 37-ე წლისთავი აღნიშნეს. როგორც “თბილისი თაიმსს” საგარეო საქმეთა სამინისტროდან აცნობეს, დედაენის დღის 37-ე წლისთავის აღსანიშნავად უნგრეთში საქართველოს საელჩოსა და ლორანდის უნივერსიტეტის ჰუმანიტარულ მეცნიერებათა ფაკულტეტის ორგანიზებით, ბუდაპეშტის ეოტვოშ ლორანდის სახელობის უნივერსიტეტში ქართული ენის, კულტურისა და ისტორიის თემაზე უნგრელი ქართველოლოგის ჰაინალკა ბაბირაკის ღია ლექცია გაიმართა. ჰაინალკა ბაბირაკმა დამსწრე საზოგადოებას ქართული ენისა და უნიკალური დამწერლობის ისტორია გააცნო, მოუთხრო ქართული მწერლობის უძველეს ძეგლებზე და მიმოიხილა საქართველოს ისტორია. ჰაინალკა ბაბირაკმა ილია ჭავჭავაძისა და გალაკტიონ ტაბიძის ლექსები, როგორც ქართულ, ასევე უნგრულ ენაზე წაიკითხა. ლექციას უნგრეთის აკადემიური, სამეცნიერო და კულტურული წრეების წარმომადგენლები, უნგრელი სტუდენტები და უნგრეთში მცხოვრები თანამემამულეები ესწრებოდნენ. ლექციის შემდეგ სტუმრებმა ქართული ღვინო დააგემოვნეს.
