სოჭის ოლიმპიადაზე ქართული ღვინის რეკლამირება არ იგეგმება

ღვინის ეროვნული სააგენტო სოჭის ოლიმპიადის ფარგლებში ღვინის ორგანიზებულად რეკლამირებას არ გეგმავს საქართველოს ღვინის ეროვნული სააგენტოს განცხადებით, რუსული სააგენტოების მიერ გავრცელებული ინფორმაცია, სოჭის ოლიმპიადაზე ქართული ღვინის პოპულარიზაციის თაობაზე, სიმართლეს არ შეესაბამება. „ღვინის ეროვნული სააგენტო სოჭის ოლიმპიადის ფარგლებში ღვინის ორგანიზებულად რეკლამირებას არ გეგმავს. თუმცა, კერძო სექტორის ინიციატივებს ამ მიმართულებით არ გამოვიცხავთ,“- აღნიშნავს ღვინის ეროვნული სააგენტოს ხელმძღვანელი ლევან დავითაშვილი. მისივე განცხადებით, საერთაშორისო ბაზრებსა და მათ შორის რუსულ ბაზარზე ქართული ღვინის მიმართ ინტერესი დღითი დღე იზრდება. „ქართული კომპანიებისთვის, რომლებიც ექსპორტს ამ მიმართულებით ახორციელებენ, შემაფერხებელი ფაქტორი არ არსებობს, მთავარია ხარისხიანი ნაწარმი იყოს წარმოდგენილი“, – აცხადებს ლევან დავითაშვილი. 2013 წლის ღვინის ექსპორტმა 46 ქვეყანაში 47 მილიონ ბოთლს (0,75 ლტ.) მიაღწია. აქედან რუსეთში ექსპორტს უკავია 22 მილიონამდე ბოთლი (0,75 ლტ. ბოთლი ღვინო). სულ, ალკოჰოლური სასმელების (ღვინო, ბრენდი, ჭაჭა, საბრენდე სპირტი და სხვა) ექსპორტი თანხებში შეადგენს 231 829 540 აშშ დოლარს, რომელიც 2012 წელთან შედარებით 42%-ით მეტია. 08.01.14