საქართველოს ჯანდაცვის მინისტრის დავით სერგეენკოს მოსაზრებით, ექსპერტები, რომლებმაც პატრიარქს სუროგაციისა და ხელოვნური განაყოფიერების შესახებ რეკომენდაცია მიაწოდეს , ალბათ ვალდებულები იყვნენ, საკითხში უფრო ღრმად ჩაეხედათ.
ჯანდაცვის მინისტრის მოსაზრებით, პატრიარქის საშობაო ეპისტოლეში რეალურად უმნიშვნელოვანესი საკითხები იყო წარმოჩენილი. დავით სერგეენკოს შეფასებით, ყველაზე მნიშვნელოვანი აბორტის თემა იყო.
როგორც მინისტრმა აღნიშნა, გულსატკენია, რომ აბორტების თემას საზოგადოების მხრიდან რეაგირება არ მოჰყოლია. მისივე თქმით, აღნიშნულ საკითხზე საზოგადოების რეაქცია იმაზე ნაკლებიც რომ ყოფილიყო, ვიდრე სუროგაციის თემას მოჰყვა, ეს საკითხი მნიშვნელოვანი იქნებოდა.
რაც შეეხება სუროგაციისა და ხელოვნური განაყოფიერების საკითხებს, მინისტრის განცხადებით, საზოგადოების ნაწილის რეაქცია ამაზე ერთგვარად მარგინალურია, თან ადამიანების იმ ჯგუფისგან, რომელიც, მინისტრის მოსაზრებით, საქმის სპეციფიკაში ჩახედული არ არიან.
როგორც დავით სერგეენკომ განმარტა, ხელოვნური განაყოფიერება, ე.წ. ინ ვიტრო უკვე 36 წელია, დანერგილია. მინისტრის ინფორმაციით, ტექნოლოგიის ავტორი რობერტ ედუარდსი 2010 წელს ნობელის პრემიის ლაურეატი გახდა, მაგრამ მიუხედავად ასეთი მასშტაბური ტექნოლოგიისა და მეცნიერებაში უმაღლესი რანგის ჯილდოს მოპოვებისა, უშუალოდ ტექნოლოგიის ავტორიც კი სიცოცხლის ბოლო წლებამდე ტოვებდა უამრავ კითხვას.
როგორც სერგეენკომ აღნიშნა, ახლაც მიმდინარეობს დისკუსია სამედიცინო წრეებში აღნიშნულ ტექნოლოგიასთან დაკავშირებით.
ჯანდაცვის მინისტრის ინფორმაციით, 2010 წლის მდგომარეობით 4 მილიონზე მეტი ბავშვი დაიბადა აღნიშნული ტექნოლოგიით. პირველი ხელოვნური გზით განაყოფიერებული ბავშვი ქვეყანას 1978 წელს მოევლინა.
როგორც მინისტრმა აღნიშნა, დღესაც სამეცნიერო წრეებში მიმდინარეობს ინტენსიური დისკუსია საფრთხეებზე, ხანგრძლივ შედეგებზე და არსებობს არამარტო რელიგიური, არამედ ბიოეთიკური საკითხი.
დავით სერგეენკოს განცხადებით, მსჯელობა მიმდინარეობს იმასთან დაკავშირებით, რომ ხდება რამდენიმე კვერცხუჯრედის განაყოფიერება, თუმცა მიმდინარეობს ერთის ან რამდენიმეს განვითარება, ანუ განაყოფიერებული კვერცხუჯრედები იღუპება. დავით სერგეენკოს განცხადებით, არა მარტო რელიგიური, არამედ ბიოეთიკური თვალსაზრისითაც ეს არის თემა, რომელიც პრობლემატურად შეიძლება ჩაითვალოს და მას ღრმა და ექსპერტული ანალიზი სჭირდება.
მინისტრი ვარაუდობს, რომ ექსპერტები, ვინც პატრიარქს საკითხთან დაკავშირებით რეკომენდაცია და ანალიზი მიაწოდეს, ალბათ, ვალდებულები იყვნენ, უფრო ღრმად ჩაეხედათ ამ საკითხში და ფაქიზი თემის უფრო დახვეწილი ანალიზი გაეკეთებინათ.
“ექსპერტებს, რომლებმაც ეს საკითხი მოამზადეს ეპისტოლესათვის, ალბათ უფრო ღრმა და დახვეწილი ანალიზი უნდა ჩაეტარებინათ ასეთ ფაქიზ საკითხზე”, – განაცხადა დავით სერგეენკომ.
მისივე თქმით, სუროგაცია საქართველოს კანონმდებლობით აკრძალული არ არის.
სუროგაციის თემას საქართველოს პატრიარქი საშობაო ეპისტოლეში შეეხო.
“შეიძლება, ოჯახი იყოს ბედნიერი, სადაც სუროგატი დედის მიერ დაბადებული ბავშვი იზრდება?” – ამის შესახებ სრულიად საქართველოს კათოლიკოს-პატრიარქის, უწმინდესი და უნეტარესის, ილია მეორე საშობაო ეპისტოლეშია აღნიშნული.
პატრიარქი ხელოვნურ განაყოფიერებას, სინჯარაში ჩასახული ბავშვებსა და სუროგაციას მძიმე ეთიკურ საკითხებად მოიხსენიებს და ოჯახის ღირებულებაზე საუბრობს.
“განა შეიძლება, ბედნიერი იყოს ის ოჯახი, სადაც აბორტი კეთდება და უსუსური პატარა არსებების უღვთოდ დაჩეხილი სხეულების აჩრდილები დადიან? როგორი საშინელებაა იმის წარმოდგენაც კი, რომ ყოველ წელს, არაოფიციალური მონაცემებით, მილიონამდე აბორტი კეთდება საქართველოში და ამის შემჩერებელი ჯერჯერობით არავინ არის.
შეიძლება ოჯახი იყოს ბედნიერი, სადაც სუროგატი დედის მიერ დაბადებული ბავშვი იზრდება? ეს პატარა ხომ თავიდანვე გაწირეს უსიყვარულობისთვის, მიუსაფრობისა და მარტოობისთვის. იგი კეთილდღეობაშიც რომ გაიზარდოს, მუცლადყოფნის პერიოდის ამ სიმძიმეს ვერაფერი შეცვლის და ეს აუცილებლად იჩენს თავს ზრდასრულ ასაკში.
პრობლემატურნი იქნებიან ის ბავშვებიც, რომლებიც ხელოვნური განაყოფიერებით დაიბადნენ და მათი სიცოცხლე მრავალი ემბრიონის განადგურების შედეგად განვითარდა”, – აღნიშნულია პატრიარქის საშობაო ეპისტოლეში.
08.01.14
Discussion about this post