ბაქო-თბილისი-ყარსის რკინიგზის მშენებლობის დაგეგმილ ღონისძიებზე ისაუბრეს

საქართველოს ეკონომიკისა და მდგრადი განვითარების სამინისტროში ბაქო-თბილისი-ყარსის სარკინიგზო პროექტის მიმდინარეობის საკითხზე იმსჯელეს. როგორც “თბილისი თაიმსს” ეკონომიკის სამინისტროდან აცნობეს, სამუშაო შეხვედრას ვიცე-პრემიერი, ეკონომიკისა და მდგრადი განვითარების მინისტრი გიორგი კვირიკაშვილი ხელმძღვანელობდა. საუბარი ბაქო-თბილისი-ყარსის რკინიგზის მშენებლობის 2013 წლის ანგარიშსა და 2014 წელს დაგეგმილი ღონისძიებებს შეეხო. შეხვედრას ეკონომიკის მინისტრის პირველი მოადგილე დიმიტრი ქუმსიშვილი, მინისტრის მოადგილე ნათია მიქელაძე, შპს “მარაბდა კარწახის რკინიგზის” დირექტორი ოლეგ ბიჭიაშვილი და სხვა ოფიციალური პირები ესწრებოდნენ. ეკონომიკის სამინისტროს განმარტებით, ბაქო-თბილისი-ყარსის პროექტი მარაბდა-ახალქალაქის 153 კმ-იანი მონაკვეთის რეაბილიტაცია-რეკონსტრუქციას და ახალქალაქიდან თურქეთის საზღვრამდე 27 კმ-იანი რკინიგზის მონაკვეთის მშენებლობას ითვალისწინებს. უახლოეს მომავალში ბაქო-თბილისი-ყარსის რკინიგზის პროექტზე საქართველო-აზერბაიჯანის ორმხრივი საკოორდინაციო საბჭოს მორიგი სხდომა გაიმართება. საკოორდინაციო საბჭო სარკინიგზო ხაზის მშენებლობასთან დაკავშირებულ ფინანსურ და ტექნიკურ საკითხებზე იმსჯელებს. 09.01.14