საფრანგეთის წამყვანმა კულტურულ-შემეცნებითმა ტელეარხმა ARTE-მ ქართულ ღვინოს, მისი ტრადიციების, ქვევრსა და ღვინის დაყენების ტექნოლოგიების შესახებ დოკუმენტური ფილმის ჩვენება მოაწყო.
საგარეო საქმეთა სამინისტროს ინფორმაციით, ფილმში სათაურით “საქართველო ღვინის სიყვარულისთვის” მთავარი აქცენტი საქართველზე, როგორც რეგიონში ღვინის ტრადიციულ მწარმოებელზეა გაკეთებული.
ფილმში აღნიშნულია, რომ კომუნისტურ ეპოქაში საქართველო მიჩნეული იყო, როგორც საბჭოთა კავშირის მარანი. მისი ჩამოშლის შემდეგ კი ღვინო რჩებოდა ქვეყნის ექსპორტის მთავარ საგნად, თუმცა 2006 წელს რუსეთის ემბარგო, სხვადასხვა პროდუქციასთან ერთად ქართულ ღვინოსაც შეეხო. მიუხედავად ამისა ქართველმა მეღვინეებმა ახალი ბაზრების ძიების პარალელურად სრული დატვირთვით გააგრძელეს წარმოება.
ტელეარხმა ARTE-მ საქართველოს შესახებ დოკუმენტური ფილმი 2009 წელს გადაიღო. პრემიერის შემდეგ მიმდინარე კვირას ტელეარხმა ფილმის განმეორებითი ჩვენება გამართა.
ფრანკო-გერმანული სატელევიზიო არხი ARTE საფრანგეთში ერთ-ერთი პოპულარული არხია და იგი ევროპული კულტურის, ხელოვნებისა და მეცნიერების შესახებ მაუწყებლობს.
10.01.14