მომღერალი გიორგი სუხიტაშვილი რამდენიმე დღის წინ პროტესტს შეუერთდა და სოციალურ ქსელში დაწერა, რომ დაგეგმილ ღონისძიებებს ისიც აუქმებს.ასევე განმარტა, რომ მისი შემოსავლების 90% სწორედ მის პროფესიას უკავშირდება.
- ამჯერად, მორიგ პოსტს ავრცელებს, სადაც ამბობს, რა სირთულეებს წააწყდა გაუქმებული კონცერტებისა და ღონისძიებების გამო.
“კონკრეტული მოცემულობა მაქვს და კონკრეტული კითხვები, შესაბამისად კონკრეტული პასუხები მჭირდება, ვიღაცების მაგალითები, ამან ის თქვა, იმან ის გააკეთა არ მჭირდება.
ჩემი შემოსავლის ერთად ერთი წყარო ჩემი პროფესიაა, სიმღერა. ვის მოგწონვართ და ვის არა ეგ აქ მეასე ხარისხოვანია.ამ სიტუაციაში ბიუჯეტიდან დაფინანსებული ნებისმიერი საახალწლო კონცერტი მინიმუმ უადგილოდ მიმაჩნია იმ ვითარებაში როცა ბიუჯეტიდან დაფინანსებული უწყებები ცხვირპირს ალეწავს ხალხს, მერე აკავებს და განუზომელი რაოდენობის შეურაცხყოფასთან ერთად ასევე დიდ ჯარიმებს აკისრებს.
ახლა მაქვს ასეთი მოცემულობა, ჩემს ანგარიშზე არსებული თანხა ვერ ფარავს ჩემს საბანკო ვალდებულებას, მაქვს რამდენიმე კერძო (რესტორანი) შეთანხმებული ღონისძიება (არჩევნებამდე შეთანხმებული) რამდენიმე გააუქმა დამკვეთმა.
- ახლა კითხვას გისვამთ, თუ მუშაობს მაღაზია, ავტო სერვისი, კვების ობიექტები, საჯარო სამსახურები, ამ ყველაფერში ეს ხალხი იღებს ანაზღაურებას, მე რატომ ვარ ქვეყნის მოღალატე, რუსეთუმე, ქოცი და კიდე 1000 რამე, იმის გამო რომ ჩემი პროფესია ასეთია?
მე რომ ვიყავი 13 წლის მქონდა ავთვისებიანი სიმსივნის დიაგნოზი, მამაჩემს არ ემღერებოდა მაგრამ ყოველ საღამოს მღეროდა იმისთვის რომ თავი გაეტანა ოჯახს და ჩემი საჭიროებები მოეგვარებინა. მიპასუხეთ სიმსივნიანი შვილის მამას ემღერებოდა და ეხალისებოდა ეს?! თქვენი აზრით მე მეზეიმება და მემღერება?!
მითხარით კონკრეტულად, რა უნდა გავაკეთო და როგორ გავიტანო თავი ასეთ დროს?უყურებ შენს ფინანსებს და ვერ ფარავ ბანკის ვალდებულებას, რა უნდა გავაკეთო?! პირველ რიგში გეკითხებით იმათ ვინც დგახართ და კომენტარებში ჩემზე ხტუნაობთ მასხარად მიგდებთ, შეურაცხყოფას მაყენებთ და მე მიწოდებთ ქვეყნის და ხალხის მოღალატეს! კონკრეტულად ჩემ შემთხვევაზე მიპასუხეთ არ მაინტერესებს ვინ სად რა გააკეთა რატომ და როგორ!” – წერს გიორგი სუხიტაშვილი.
