დეპუტატი ირაკლი ზარქუა, რომელიც აბუ-დაბიდან 3 დღეა რაც დაბრუნდა, იქ მომხდარ ინციდენტზე ჰყვება. როგორც ამბობს, ლაშა გაბიტაშვილმა მათ წინააღმდეგ პროვოკაცია მოაწყო, რასაც შემდგომი მოვლენები მოჰყვა.
ასევე განმარტავს, რომ გავრცელებული ინფორმაცია 80 000-ლარიან ჯარიმაზე არასწორია.
“ხმაურიანი მოგზაურობა გამოგვივიდა აბუ-დაბიში… უპირველეს ყოვლისა ყველას მადლობა უნდა ვუთხრა, ვინც გვამხნევებდა. ვინც გვეუბნებოდა, რომ სწორად მოიქეცით. ის, რაც მოხდა, ეს არ არის საამაყო, უბრალოდ, შეურაცხყოფაზე, ოჯახის, შვილების, ახლობლების შეურაცხყოფაზე, მიუხედავად თმენის ვალდებულებისა, ყოველთვის ასეთი რეაგირება გვექნება იმიტომ, რომ კაცები ვართ და ქართველები ვართ.
რაც შეეხება ამ თემას, თქვენ ნახეთ, რომ საუზმის დროს პროვოკაცია მოეწყო, იქ მიიღო მისაღები. ამის შემდეგ მეორე დღესაც იგივე, თან ეს ცოლ-ქმარი რეჟისურის დადგმას როგორ ახერხებდნენ, ზუსტად ის რომ მონაკვეთი გადაეღოთ. მესამე დღეს მოხდა ის, რაც ვნახეთ, რაც მოჰყვა პროცედურას. იცით იქ საკმაოდ მკაცრი კანონებია და დაიწყო იქ გამოძიება. პოლიციამაც პროკურატურამაც და სასამართლომაც გაიაზრო, რომ ეს იყო პროვოკაცია ჩვენს წინააღმდეგ დადგმული. მესამე დღეა აქ ჩამოსულები ვართ.
იქაც გვეცინებოდა ხოლმე ეს უსამშობლოები და მათთან აფილირებული ჟურნალისტები, თუ პოლიტოლოგები, რომ ამბობდნენ, რომ ერთი წელი მიუსაჯეს, რაღაც 80 000 დოლარი, რაღაც სიგიჟეებს რომ ჰყვებოდნენ. მარაზმი. ჯარიმა გამოიწერა დირჰამებში 10-15-ჯერ უფრო ნაკლები და იქ ჩვენ მეგობრები გვყავდნენ, ვინც გადაიხადეს და ამ 3 და 4 ათას დოლარს ჩვენ, ბუნებრივია, მერე გადავიხდით, თბილისში ვარ უკვე და რამენაირად მოვახერხებ. ეს იყო და ეს” – თქვა ზარქუამ.
შეგახსენებთ, რომ 13 იანვარს, აბუ-დაბიში, „ქართული ოცნების“ დეპუტატები ირაკლი ზარქუა, ვიქტორ სანიკიძე და გელა სამხარაული მოქალაქე ლაშა გაბიტაშვილს ფიზიკურად დაუპირისპირდნენ. ფაქტის ამსახველი ვიდეომასალა სოციალურ ქსელში გავრცელდა.
შემთხვევა სასტუმროს სასადილოში მოხდა. კადრებში ჩანს, რომ ლაშა გაბიტაშვილს, სადილობის დროს, ირაკლი ზარქუამ საჭმელი შეაყარა და ფიზიკურად დაუპირისპირდა, შემდეგ კი ჩხუბში ვიქტორ სანიკიძე ჩაერთო.
