„საქსტატის“ მონაცემებით, 2025 წლის 1-ლი იანვრის მდგომარეობით, გასული წლის იგივე პერიოდთან შედარებით, საქართველოს მოსახლეობა 9.9 ათასით გაიზარდა და 3 704 500 კაცი შეადგინა. ეს მაშინ როდესაც, ქვეყანაში 2024 წელს უარყოფითი ბუნებრივი მატება (-4 488) და დადებითი მიგრაციული სალდო (14 386) იყო.
კითხვაზე, ვის ხარჯზე იზრდება საქართველოს მოსახლეობა, სტატისტიკოსი სოსო არჩვაძე „ბიზნესპრესნიუსთან“ საუბრისას ამბობს, რომ ზრდა ხდება იმ უცხოელების ხარჯზე, რომლებიც შესაძლოა, საქართველოს მოქალაქეები არ არიან, თუმცა, საქართველოში ცხოვრობენ.
ამასთან, სტატისტიკოსი განმარტავს, რომ ქვეყანაში უფრო მეტი უცხოელი შემოდის, ვიდრე გადის. აქ დარჩენილები კი, ქვეყნის ფაქტობრივ მოსახლეობას წარმოადგენენ.
„საქართველოში ქართველების წილი მცირდება“
„ბოლო წლების სამწუხარო ტენდენცია ასაბუთებს, რომ საქართველოს მოქალაქეების მიხედვით ჩვენს ქვეყანას აქვს უარყოფით სალდო. ანუ გადის მეტი, ნაკლები შემოდის. ხოლო, არარეზიდენტების მიხედვით, ქვეყანას აქვს დადებითი სალდო. ე.ი. სხვა ქვეყნის მოქალაქე უფრო მეტი შემოდის, ვიდრე გადის. ეს არის იმის ერთ-ერთი ფაქტორი, რომ ქვეყანაში ქართველების წილი მცირდება.
თანაც, უნდა გავითვალისწინოთ, რომ ჩვენი მოსახლეობა არის რეგიონში ყველაზე ხანდაზმული ერი. რეგიონში მედიანური ასაკი ჩვენთან უფრო მაღალია, ხოლო, მოსახლეობის სიმჭიდროვე შედარებით დაბალი. ეს კიდევ დამატებითი საფრთხის შემქმნელია“,- ამბობს სოსო არჩვაძე.
„რა თქმა უნდა, ის ადამიანები, ვინც 1 წელზე მეტ ხანს ატარებენ საქართველოში, თავისთავად ითვლებიან საქართველოს მოსახლეობაში. საქართველოში უცხოელი სტუდენტების რაოდენობას რომ გადავხედოთ, ყოველი მეხუთე სტუდენტი არის უცხოელი. ეს არის, ინდოეთი, სირია, ბანგლადეში ერაყი და ა.შ. ამიტომ, მათი რიცხოვნობა მონაწილეობს საქართველოს საერთო რაოდენობის განსაზღვრაში.
ამასთან, არსებობს მოახლოების იურიდიული და ფაქტობრივი რაოდენობა. ისინი საქართველოს მოქალაქეები არ არიან, მაგრამ საქართველოს ტერიტორიაზე იმყოფებიან, ერთობლივ მოთხოვნებს განსაზღვრავენ: სატრანსპორტო საჭიროებებზე, კვების პროდუქტებზე და რიგ სხვა ინფრასტრუქტურულ, თუ სხვა სახის მომსახურებასთან დაკავშირებით,“ – ამბობს სოსო არჩვაძე.
მისი თქმით, სახელმწიფოს მხრიდან უფრო აქტიური ქმედებებია გასატარებელი.
„დაგვჭირდება სახელმწიფოს მხრიდან უფრო აქტიური მოქმედება, რომ ჯერ ერთი, გავზარდოთ შობადობა და სოციალური პრესტიჟულობა გავუზარდოთ მრავალშვილიან ოჯახებს. მეორეს მხრივ, უნდა შევქმნათ ღირსეული შრომის პირობები ახალგაზრდებისთვის, რომლებიც განათლებას იღებენ საქართველოში ან უცხოეთში. ეს იქნება შესაძლებლობა, რომ მოსახლეობის დემოგრაფიულმა მდგომარეობამ მიიღოს პოზიტიური დატვირთვა,“ – ამბობს სოსო არჩვაძე.
