სამხრეთ აფრიკის რესპუბლიკაში საქართველოს საელჩომ უმასპინძლა „სამხრეთ აფრიკა-საქართველოს სავაჭრო პალატის (სასსპ)“დამფუძნებელ შეხვედრას. ორი ქვეყნის ურთიერთობებში ამ საეტაპო მოვლენას დაესწრო და სავაჭრო პალატის დამფუძნებელ წევრებად დარეგისტრირდა 20-მდე სამხრეთ აფრიკული და ქართული კომპანიის წარმომადგენელი და ინდივიდუალური მეწარმე. შეხვედრას თავმჯდომარეობდა და ორგანიზაციის დაფუძნებისთვის საჭირო პროცედურების ჩატარებას უძღვებოდა პრეტორიაში მოქმედი ავტორიტეტული იურიდიული კომპანიის Weavand & Weavand-ის წარმომადგენელი ექარდ ლე რუ. დამფუძნებელმა კრებამ დაამტკიცა პალატის წესდება და აირჩია მმართველი კომიტეტის წევრები. პალატის თავმჯდომარედ ერთხმად იქნა არჩეული ბიზნესმენი, ლამბერტ ტერონი, რომელიც რამდენიმე ათწლეულის განმავლობაში სამხრეთ აფრიკაში წარმატებით ეწევა ბიზნეს საქმიანობას სხვადასხვა სექტორში და უკვე გადადგა პირველი ნაბიჯები საქართველოში ბიზნეს-პროექტების განსახორციელებლად. დამფუძნებელი კრება გახსნა სამხრეთ აფრიკის რესპუბლიკაში საქართველოს ელჩმა ბექა დვალმა, რომელიც მიესალმა სამხრეთ აფრიკა-საქართველოს სავაჭრო პალატის დამფუძნებელ წევრებს და ხაზი გაუსვა პალატის მნიშვნელობას. აღინიშნა, რომ პალატა მოწოდებულია გახდეს უნიკალური ფორუმი თითოეული იმ ბიზნესმენის მხარდასაჭერად, რომელიც უკვე ჩართულია ან გადაწყვეტს ჩაერთოს ორ ქვეყანას შორის ბიზნეს პროექტების რეალიზაციაში. ელჩმა გამოთქვა იმედი, რომ პალატის ფუნქციონირება დამატებით სტიმულს მისცემს საქართველოსა და სამხრეთ აფრიკას შორის ეკონომიკური ურთიერთობების განვითარებას და დააფიქსირა საელჩოს მხრიდან პალატასთან მჭიდრო თანამშრომლობის მზადყოფნა. პალატის ახლად არჩეულმა თავმჯდომარემ ლამბერტ ტერონმა მადლობა გადაუხადა დამფუძნებელი კრების წევრებს მისთვის მინიჭებული ნდობისთვის, ასევე, დააფიქსირა მადლიერების გრძნობა პრეტორიაში საქართველოს საელჩოს და ელჩის მიმართ პალატის დაფუძნებაში შეტანილი მნიშვნელოვანი წვლილისთვის. ბატონმა ტერონმა განაცხადა, რომ ძალისხმევას არ დაიშურებს, რათა პალატის საქმიანობა ნაყოფიერი გამოდგეს თითოეული წევრისთვის და მოხდეს ორ ქვეყანას შორის ვაჭრობის და ბიზნესის სხვა სფეროებში არსებული შესაძლებლობების მაქსიმალური რეალიზაცია. 15.01.14
