62 წლის ქალის ტრაგიკული ისტორია მტკვრის მარცხენა სანაპიროზე 2 წლის წინ დაიწყო. სხეულით ვაჭრობის გადაწყვეტილება მისი ერთადერთი ტრაგედია არ აღმოჩნდა, მალევე ტრეფიკინგის მსხვერპლად იქცა. ტრეფიკიორი კი, სანაპიროზე გაიცნო – ის 27 წლის ქალია, რომელმაც ფიზიკური განადგურების მუქარით, ყოველდღიური გადასახადი დაუწესა.
“კურიერი P.S-მა” დახურული საქმიდან მსხვერპლი ქალის ჩვენება მოიპოვა.
ჩვენებაში ტრეფიკინგის მსხვერპლი იხსენებს, რომ პოლიციაში შიშის გამო ვერ რეკავდა. მისი ტრაგედია კიდევ დიდხანს გაგრძელდებოდა, რომ არა სამართალდამცველები. პოლიციამ საქმე ოპერატიული ინფორმაციით გახსნა. საქმეში უმძიმესი შინაარსის აუდიოფაილები დევს.
27 წლის ქალი დააკავეს. სასამართლო განხილვები დახურულ კარს მიღმა დაიწყო. ბრალდებული ტრეფიკიორობას თვეების განმავლობაში უარყოფდა. ბოლო სხდომაზე კი დანაშაული აღიარა. ადვოკატი ეჭვობს, რომ ბრალდებულმა ამით სასჯელის შემსუბუქება სცადა. შეთანხმებული პოზიციის შეცვლის მოტივით, ტრეფიკიორის ადვოკატი საქმეს ჩამოშორდა.
გამოძიებამ ვალის ვერსია გამორიცხა. გაირკვა, რომ ტრეფიკიორმა 62 წლის ქალს ერთი წლის განმავლობაში ათასობით ლარი გამოსძალა.
განაჩენი რამდენიმე დღის წინ გამოცხადდა. მოსამართლემ ბრალდებული ქალი სრულად დამნაშავედ ცნო.
62 წლის ქალის მძიმე ისტორია ნაწილობრივ დასრულდა – 27 წლის ტრეფიკიორი ციხეში 7 წელს და 3 თვეს გაატარებს.
