ირანელი პროტესტანტი ერფან სოლტანი სიკვდილით დასჯის პირასაა. 26 წლის სოლტანს 14 იანვარს ჩამოახრჩობენ. შესაბამისად, მთელი მსოფლიოს ყურადღება ამ საშინელი ფაქტისკენაა მიმართული.
თეირანმა საპროტესტო აქციებზე ძალადობრივი ზომები მიიღო და მონაწილეებს „მეამბოხეებად“ მოიხსენიებს. ირანის ხელისუფლება ემზადება სიკვდილით დასაჯოს პროტესტის მონაწილე. ადამიანის უფლებათა დამცველი ორგანიზაციების ცნობით, ეს შეიძლება იყოს პირველი სიკვდილით დასჯა, რომელიც დაკავშირებულია ქვეყანაში მიმდინარე ანტისამთავრობო საპროტესტო აქციებთან.
ვინ არის ერფან სოლტანი?
ერფან სოლტანი 26 წლის ირანელი პროტესტანტია, რომელიც უზენაესი ლიდერის, აიათოლა ხამენეის რეჟიმის წინააღმდეგ გამართულ საყოველთაო დემონსტრაციებში მონაწილეობისთვის დააკავეს. სოლტანი თეირანთან ახლოს, კარაჯის გარეუბანში, ფარდისის მკვიდრია.
The New York Post-ის ცნობით, სოლტანი 8 იანვარს ანტისამთავრობო დემონსტრაციებში მონაწილეობის დროს დააკავეს. წყაროებმა ირანის ადამიანის უფლებათა დაცვის ორგანიზაციას (IHR) განუცხადეს, რომ „მის ოჯახს უთხრეს, რომ მას გამოუტანეს სიკვდილით დასჯა და სასჯელი 14 იანვარს უნდა აღსრულდეს“.
როგორც ამბობენ, სოლტანის ბრალი წაუყენეს „ღმერთის წინააღმდეგ ომის წარმოებაში“, რაც ირანის კანონმდებლობით სიკვდილით დასჯას ითვალისწინებს, იტყობინება The US Sun.
სოლტანის მხარდამჭერებმა განაცხადეს, რომ მას ჩამოხრჩობით სიკვდილით დასჯამდე, არც ადვოკატის აყვანის და არც თავდაცვის საშუალება არ მისცეს.
აქტივისტებმა განაცხადეს, რომ სოლტანის, ოჯახთან დასამშვიდობებლად, მხოლოდ 10 წუთი მისცეს. ინფორმაციის თანახმად, სოლტანის დას, ლიცენზირებულ ადვოკატს, ძმის საქმის მასალებზე წვდომა შეუზღუდეს და სასამართლოში წარმომადგენლობაც არ მისცეს.
დარბევა მკაცრდება, რადგან დაღუპულთა რიცხვი იზრდება
თეირანმა საპროტესტო აქციების ძალადობრივი დარბევა დაიწყო და მონაწილეებს „მეამბოხეები“ უწოდა. „როიტერის“ ცნობით, საპროტესტო აქციებში დაახლოებით 2000 ადამიანი დაიღუპა, მათ შორის, უსაფრთხოების თანამშრომლები. აშშ-ში დაფუძნებულმა უფლებადამცველმა ჯგუფმა HRANA-მ განაცხადა, რომ 12 იანვრის ბოლოსთვის 646 ადამიანის დაღუპვა დაადასტურა, მათ შორის – 505 მომიტინგე, 113 სამხედრო და უსაფრთხოების ძალების წევრი და შვიდი გამვლელი, ხოლო გამოძიება კიდევ 579 დაღუპულთან დაკავშირებით მიმდინარეობს. HRANA-მ დასძინა, რომ 28 დეკემბერს საპროტესტო აქციების დაწყებიდან 10 721 ადამიანი დააკავეს.
აშშ-ის პრეზიდენტმა დონალდ ტრამპმა თეირანი გააფრთხილა, რომ მომიტინგეების წინააღმდეგ ძალადობამ, შესაძლოა, ვაშინგტონის მხრიდან სამხედრო რეაგირება გამოიწვიოს. თეთრმა სახლმა 12 იანვარს განაცხადა, რომ აშშ ირანის დაბომბვის საკითხს განიხილავს. საპასუხოდ, ირანმა გააფრთხილა, რომ თუ პირველი დარტყმა განხორციელდება, მაშინ ირანი მიზანში ამოიღებს ამერიკულ სამხედრო და კომერციულ ობიექტებს. გამოცემა „The US Sun“-ის ცნობით, ირანის საგარეო საქმეთა მინისტრმა, აბას არაღჩიმ განაცხადა: „ირანის ისლამური რესპუბლიკა ომს არ ეძებს, მაგრამ ომისთვის სრულად მზადაა“.
