ირანში, მაღაზიის მეპატრონეს ანტისამთავრობო საპროტესტო აქციაში მონაწილეობისთვის სიკვდილით დასჯა მიესაჯა. 26 წლის ერფან სოლტან, სავარაუდოდ, დღეს ჩამოახრჩობენ. სოლტანის ნათესავმა BBC Persian-ს განუცხადა, რომ ირანის სასამართლომ განაჩენი “ძალიან სწრაფი პროცესით, სულ რაღაც ორ დღეში“ გამოიტანა. ისინი დახმარებისთვის აშშ-ის პრეზიდენტს. დონალდ ტრამპს მიმართავენ:
- “ჩვენ ძალიან გვჭირდება ტრამპის დახმარება. გემუდარებით, არ მისცეთ მას ერფანის სიკვდილით დასჯის უფლება” – განუცხადა მედიას ერფანის ბიძაშვილმა.
“ის ყოველთვის იბრძოდა ირანის თავისუფლებისთვის, დღეს კი სახრჩობელას წინაშე დგას. ახალგაზრდების სიკვდილით დასასჯელად, ისინი მათ წინააღმდეგ ბრალდებებს აყალბებენ“.
ირანში სიკვდილმისჯილ პატიმრებს, როგორც წესი, უკანასკნელი წუთების საყვარელ ადამიანებთან ერთად გატარების უფლება აქვთ. ახალი ინფორმაციის თანახმად, ახალგაზრდა პროტესტანტს ოჯახთან დასამშვიდობებლად მხოლოდ 10 წუთი მიეცა.
სამშაბათს, Truth Social-ზე გამოქვეყნებულ პოსტში ტრამპმა ირანელებს მოუწოდა, განაგრძონ პროტესტი და დაიმახსოვრონ მოძალადეების სახელები.
“ირანელი პატრიოტებო, განაგრძეთ პროტესტი – დაიკავეთ თქვენი ინსტიტუტები!!!… დახმარება გზაშია“, – თქვა ტრამპმა, თუმცა არ დაუკონკრეტებია, თუ რა სახის დახმარებაზე იყო საუბარი. მანამდე, პრეზიდენტი ირანს მიმდინარე საპროტესტო აქციებში ჩართული დემონსტრანტების დახოცვის შემთხვევაში, აშშ-ს ჩარევით დაემუქრა.
“ირანი სერიოზულ გასაჭირშია. როგორც ჩანს, ხალხი გარკვეულ ქალაქებს იკავებს, რაც, სულ რამდენიმე კვირის წინ, შესაძლებელი არავის ეგონა. ჩვენ ვითარებას განსაკუთრებული ყურადღებით ვაკვირდებით.
მე ძალიან მკაფიოდ განვაცხადე, რომ თუ ისინი დაიწყებენ ხალხის დახოცვას ისე, როგორც ამას წარსულში აკეთებდნენ, ჩვენ ჩავერთვებით. მათ ძალიან მტკივნეულად დავარტყამთ იქ, სადაც ყველაზე მეტად ეტკინებათ. ეს არ ნიშნავს სახმელეთო ჯარების შეყვანას, მაგრამ ნიშნავს ძალიან, ძალიან ძლიერ დარტყმებს იქ, სადაც ეტკინებათ. ჩვენ არ გვინდა, რომ ეს მოხდეს” – განაცხადა პრეზიდენტმა.
