მარჯანიშვილზე მომხდარ მკვლელობაში ბრალდებულის ადვოკატი ამბობს, დაკავებული მომხდარის შესახებ არ საუბრობს და მხოლოდ იმას ამბობს, რომ მისი მეზობელი გოგო ცოცხალია.
როგორც უფლებადამცველი “ტვ პირველთან” საუბრისას ჰყვება, დაკავებული მოკლულთან ნაცნობობას არ უარყოფს.
“ფსიქიკასთან დაკავშირებული პრობლემები რეალურია, ეს დადგენილი ფაქტობრივი გარემოება არის. რაც შეეხება ვიდეოჩანაწერებს, მე როგორც ვიცი არ არის, რადგან იქ სათვალთვალო კამერები დამონტაჟებული არ არის. ნივთმტკიცების სახით გარკვეული სახის იარაღია ამოღებული. ცივი იარაღის კატეგორიას განეკუთვნება თუ არა, ეს ჯერ არ ვიცით. ვიზუალური დათვალიერებით რაც შეიძლება აღვიქვათ არის დანა. ამ გოგოსთან ნაცნობობას რა თქმა უნდა, არ უარყოფს, ამბობს, რომ იყვნენ მეზობლები, ბავშვობიდან იცნობდნენ ერთმანეთს” – ამბობს ადვოკატი.
ჟურნალისტის კითხვაზე, რა რეაქცია ჰქონდა დაკავებულს, როცა შეიტყო, რომ ეს გოგო მკვდარია, ადვოკატი პასუხობს: “ამ ფაქტთან დაკავშირებით საერთოდ არანაირი რეაქცია არ აქვს. საერთოდ მოსმენაც არ უნდა ამ ფაქტის, ერთადერთი რასაც ამბობს, თქვა ის, რომ ის (გოგო) არ არის გარდაცვლილი”.
- ცნობისთვის მკვლელობა თბილისში გუშინ მოხდა, მარჯანიშვილის ქუჩის მიმდებარე ტერიტორიაზე 38 წლის მარი თხელიძე მეზობელმა მოკლა. ბრალდებული 35 წლის მამაკაცია, რომელსაც ფსიქიკური პრობლემები ჰქონდა.
მოკლული ქალი და სავარაუდო დამნაშავე ე.წ. იტალიური ეზოს ერთ ეზოში ცხოვრობდნენ. გამოძიების ინფორმაციით, ბრალდებულმა თხელიძეს ჭრილობა ბასრი საგნით მიაყენა.
“თბილისის პოლიციის დეპარტამენტის თანამშრომლებმა, განზრახ მკვლელობის ბრალდებით 1991 წელს დაბადებული ა.დ. დააკავეს.
