საქართველოს პრეზიდენტის ადმინისტრაცია, სავარაუდოდ შექმნის დღიდან, ბუნებრივ აირს უკანონოდ მოიხმარდა, – ამის შესახებ დღეს კომპანია “ყაზტრანსგაზში” გამართულ პრესკონფერენციაზე საქართველოს ენერგეტიკის მინისტრის მოადგილე ილია ელოშვილმა კომპანიის წარმომადგენლებთან ერთად გამართულ პრესკონფერენციაზე განაცხადა.
პრესკონფერენცია კომპანიის მიერ ჩატარებული რევიზიის შედეგად გამოვლენილ ბუნებრივი აირის უკანონო დატაცების ფაქტებს მიეძღვნა. მინისტრის მოადგილის განცხადებით, მალხაზ აბდუშელიშვილის ქუჩის #1-ში რეგისტრირებულ მისამართზე, რომელიც პრეზიდენტის ავლაბრის რეზიდენციის ტერიტორიაა, აღმოჩენილია ბუნებრივი აირის უკანონოდ დატაცების ფაქტი.
შპს “ყაზტრანსგაზი თბილისის” უსაფრთხოების სამსახურის მიერ გეგმური შემოწმების შედეგად გამოვლინდა მრიცხველის გვერდით ავლით შეყვანილი გაზის მილი.
როგორც ილია ელოშვილმა განმარტა, დატაცება, სავარაუდოდ, ადმინისტრაციის შექმნის დღიდან ხდებოდა და ბუნებრივი გაზი, სასადილოსა და დამხმარე ნაგებობებს ხმარდებოდა. სავარაუდოდ, პრეზიდენტის ადმინისტრაცია თვეში დაახლოებით 5-6 000 ლარის ბუნებრივ აირს მოიხმარდა. ელოშვილის თქმით, შედგენილია ადმინისტრაციული აქტი, დალუქულია ობიექტი და მიმდინარეობს იქ დადგმული სიმძლავრეების დადგენა, რათა ზუსტად განისაზღვროს ჯარიმის ოდენობა. დაკისრებული ჯარიმა სახელმწიფო უზრუნველყოფის სამსახურმა უნდა გადაიხადოს.
მინისტრის მოადგილის თქმით, როდესაც ბედავდა პრეზიდენტის ადმინისტრაცია და იპარავდა ბუნებრივ აირს, ეს მეტყველებს იმაზე თუ რა განუკითხაობა იყო ამ სფეროში.
როგორც პრესკონფერენციაზე ითქვა, სავარაუდოდ, ეჭვი არსებობს რომ თბილისის გარშემო არსებული ფეშენებელური ვილები და სხვადასხვა კერძო ორგანიზაციები ასევე მოიხმარენ უკანონოდ ბუნებრივ აირს. კომპანია იწყებს ყველა ასეთი ობიექტის გადამოწმებას.
კომპანია “ყაზტრანსგაზის” სპეციალურმა მმართველმა ირაკლი გაბუნიამ ჟურნალისტებთან საუბრისას აღნიშნა, რომ ბოლო 4 თვეა კომპანიის უსაფრთხოების სამსახურის წარმომადგენლები აწარმოებენ ობიექტების გადამოწმებას და რევიზიას, ხდება გამოვლენა უკანონოდ მოხმარებული ბუნებრივი აირის შემთხვევების. მან მომხმარებლებს მოუწოდა თავი შეიკავონ მსგავსი ფაქტებისაგან, რადგან ადმინისტრაციული ჯარიმით დაჯარიმდებიან. მისივე თქმით, თანხის ოდენობა დანადგერების, სიმძლავრისა და სადენი მილის დიამეტრის მიხედვით დადგინდება.
17.01.14
