ახალგაზრდული მოძრაობა „დავითიანნი“ უკრაინელი თანატოლებისადმი ქართველი ახალგაზრდების მიერ მიწერილ ღია წერილს ავრცელებს:
„ქართველი ახალგაზრდები თანადგომასა და მხარდაჭერას გიცხადებთ, არა მხოლოდ როგორც ჩვენს მეგობრებს, არამედ როგორც თანამებრძლებს საერთო საქმეში. საქმეში, რომელსაც ევროპული სტრუქტურებისა და დემოკრატიზაციისკენ სვლა ჰქვია. ქართველებსა და უკრაინელებს ბევრი საერთო აქვს დაწყებული სარწმუნოებით და დამთავრებული თავისუფლებისაკენ მუდმივი სწრაფვით.
ჩვენ თვალს-ყურს ვადევნებთ კიევსა და მთელს უკრაინაში მიმდინარე პროცესებს, ვცდილობთ აქტიურად ვიყოთ ჩართულები და მიმდინარე მოვლენებზე ჩვენი პოზიცია მივაწვდინოთ თანატოლებსა და მეგობრებს სხვადასხვა ქვეყნებში.
ძალადობა და მსხვერპლი ყოველთვის მიუღებელია. განსაკუთრებით მაშინ, როდესაც საუბარი თავისუფალი და დემოკრატიული ლოზუნგებით, მშვიდობიან დემონსტრაციაზე გამოსულ ახალგაზრდებს ეხება.
მშვიდობას, მხნეობას, გამძლეობასა და წარმატებას გისურვებთ ამ რთულ პერიოდში. საქართველო უკრაინის გვერდით დგას, შესაბამისად, ქართველი ახალგაზრდები – უკრაინელი ახალგაზრდების!“ – ნათქვამია ახალგაზრდული მოძრაობა „დავითიანნის“ მიერ გავრცელებულ მიმართვაში.
29.01.14