საინფორმაციო სააგენტო ,,თბილისი თაიმსი“ მკითხველს ინტენსიურად სთავაზობს გამოკითხვებს სხვადასხვა მნიშვნელოვან და აქტუალურ თემაზე, რაც მიზნად ისახავს მოქალაქეთა ჩართულობას ქვეყანაში არსებული თემების განხილვაში და სხვადასხვა საკითხზე საერთო აზრს აცნობს საზოგადოებას.
ამჯერად დეკემბრის ბოლოს ჩვენს ვებ-გვერდზე დავსვით კითხვა ,,ვის ისურვებდით საქართველოს სტრატეგიულ პარტნიორად?“ ჩამონათვალში სასურველ ვარიანტებში წარმოდგენილი იყო ევროპის კავშირი, ამერიკის შეერთებული შტატები, რუსეთი, ჩინეთი და აზიური ვეფხვები, რომელიც თავის მხრივ გულისხმობს სამხრეთ კორეას, სინგაპურს, ჰონგკონგსა და ტაივანს. გამოკითხვაში 200-მა ადამიანმა მიიღო მონაწილეობა და შედეგებიც საინტერესოდ გადანაწილდა.
გამოკითხვაში წამყვან პოზიციებს ევროპის კავშირი ხმათა უმრავლესობით იკავებს. ხმათა 49%-ი სწორედ მასზე მოდის და შესაბამისად გამოკითხულთა უმრავლესობა ევროპული სტანდარტებისკენ მიისწრაფის და ევროპა წარმოუდგენია, როგორც საქართველოს ყველაზე სტრატეგიული პარტნიორი.
მეორე ადგილზე 27%-ით ამერიკის შეერთებული შტატებია. თუმცა მას მნიშვნელოვნად აღემატება ევროპის კავშირი. რაც შეეხება რუსეთს იმის და მიუხედავად, რომ საქართველოს ამ მეზობელ ქვეყანასთან რთული ურთიერთობა აქვს და დღემდე რჩება საქართველოს ტერიტორიის დიდი ნაწილი ამ ქვეყნის მიერ ოკუპირებული, გამოკითხულთა 15%-ს წარმოუდგენია ჩვენი ქვეყნის სტრატეგიულ პარტნიორად. აზიურ ვეფხვებს გამოკითხულთა 5%-ი ანიჭებს უპირატესობას.
ჩამოთვლილთაგან ჩინეთი ხმათა უმცირესობაში აღმოჩნდა და მან 4%-ი მიიღო. შესაბამისად აღმოჩნდა, რომ საზოგადოების ძალიან მცირე ნაწილი თუ მოიაზრებს ამ ქვეყანას საქართველოსთვის სტრატეგიულ პარტნიორად. მონაცემები არც თუ ისე დიდი სხვაობით გამოირჩევა, რაც აზრთა სხვადასხვაობაზე მეტყველებს. ამიტომ შესაძლებელია სულ პატარა მოვლენამ განაპირობოს მონაცემთა ცვლილება.
საინფორმაციო სააგენტო ,,თბილისი თაიმსი“ აგრძელებს ყოველთვიურ კვლევას და პერიოდულად მოსახლეობას საზოგადოების საერთო აზრს წარუდგენს.
30.01.14
გიორგი ჩუბინიძე
