“საქართველოს ბანკმა” “საქართველოს ბანკის უნივერსიტეტი” დააფუძნა. როგორც “საქართველო ბანკის” გენერალურმა დირექტორმა, ირაკლი გილაურმა ჟურნალისტებს განუცხადა , ბანკის მიზანია ხელი შეუწყოს ქვეყანაში განათლების სფეროში მაღალი სტანდარტების დამკვიდრებას და საშუალება მისცეს ნებისმიერ მსურველს დაეუფლოს ფინანსურ ცოდნას მისთვის სასურველ დონეზე.
“საქართველოს ბანკის უნივერსიტეტი” მოიცავს ბიზნეს სკოლას და რამდენიმე თანამედროვე განათლების ცენტრს: მომხმარებელთა ფინანსური განათლების ცენტრს, სასერთიფიკატო სწავლების ცენტრს, პროფესიული განათლების ცენტრსა და დამწყები ბიზნესის მხარდაჭერის ცენტრს.
“საქართველოს ბანკის უნივერსიტეტში” გათვალისწინებულია პროგრამები აბიტურიენტებისთვის, უკვე დასაქმებული და განვითარებაზე ორიენტირებული ადამიანებისთვის, რიგითი მომხმარებლებისთვის და საკუთარი ბიზნესის მფლობელთათვისაც კი.
როგორც ირაკლი გილაურმა აღნიშნა, “საქართველოს ბანკის უნივერსიტეტი” 2014 წლის სექტემბრიდან შესთავაზებს სტუდენტებს ბიზნეს ადმინისტრირების სამაგისტრო პროგრამას ფინანსებში.
მისივე თქმით, უნივერსიტეტის ორწლიანი ბიზნესის ადმინისტრირების სამაგისტრო პროგრამა გამოირჩევა არაერთი უპირატესობით. მათ შორისაა: პრაქტიკისა და თეორიის საუკეთესო შერწყმა; ფინანსური განათლება ქვეყანაში წამყვანი ფინანსური ინსტიტუტის წარმომადგენლებისაგან; “საქართველოს ბანკის” ჯგუფში პრაქტიკის გავლისა და დასაქმების რეალური შესაძლებლობა; საუკეთესო ადგილობრივი და საერთაშორისო აკადემიური პერსონალის ლექციები.
“საქართველოს ბანკის უნივერსიტეტის” ბიზნესის ადმინისტრირების სამაგისტრო პროგრამაზე მოხდება 50 სტუდენტის მიღება. მათგან 10 საუკეთესო მიიღებს 100%-იან დაფინანსებას “საქართველოს ბანკისაგან”, შემდეგი 20 სტუდენტი კი – 7-წლიან, 0%-იან სტუდენტურ სესხს.
რაც შეეხება სწავლის საფასურს, ის წელიწადში 7500 ლარს შეადგენს. “საქართველოს ბანკის უნივერსიტეტის” რექტორია აკაკი ხელაძე.
13.02.14
