ბრიუსელში გაიმართა ევროპარლამენტის საგარეო საქმეთა კომიტეტის (AFET) სხდომა, რომელზეც ევროპარლამენტართა წინაშე სიტყვით პირველად გამოვიდა საგარეო საქმეთა მინისტრი მაია ფანჯიკიძე.
გამოსვლაში მინისტრმა ძირითადად ისაუბრა საქართველოს ევროინტეგრაციის დღის წესრიგში არსებულ პრიორიტეტებზე, შემდგომ გეგმებსა და მიზნებზე, ვილნიუსის სამიტზე მიღწეული შედეგების გათვალისწინებით.
მან კიდევ ერთხელ დაადასტურა საქართველოს სწრაფვა ევროპულ და ევროატლანტიკურ სტრუქტურებში ინტეგრაციისკენ, რომელიც წარმოადგენს ქვეყნის საგარეო და საშინაო პოლიტიკის ქვაკუთხედს.
მინისტრმა ხაზი გაუსვა საქართველოს ხელისუფლების მტკიცე მზაობას ხელი შეუწყოს საერთო ევროპული ფასეულობების დამკვიდრებას და მეტი ინტენსივობით გააგრძელოს დემოკრატიული რეფორმების პროცესი, ევროინტეგრაციის დღის წესრიგის შესაბამისად.
მაია ფანჯიკიძემ ევროპარლამენტარებს მოკლედ გააცნო ქვეყნის მიერ მიღწეული პროგრესი პოლიტიკური და ეკონომიკური რეფორმების კონტექსტში, მათ შორის, დემოკრატიისა და კანონის უზენაესობის გაძლიერების, ადამიანის უფლებების დაცვის, ბიზნესის ხელშეწყობის, სოციალური კეთილდღეობის უზრუნველყოფის კუთხით. მაია ფანჯიკიძემ საკუთარ გამოსვლაში განსაკუთრებული ყურადღება დაუთმო უსაფრთხოების კუთხით საქართველოში არსებულ მდგომარეობას და ევროკავშირის როლის მნიშვნელობას ქვეყანაში სტაბილურობის ხელშეწყობის პროცესში.
„ყოველთვის, როდესაც საქართველოს უჭირს, ევროპარლამენტი მის გვერდით დგას და საქართველოსთვის სასარგებლო რეზოლუციებს იღებს. აქედან გამომდინარე, პერიოდულად მათი ინფორმირება საქართველოში მიმდინარე პროცესებზე აუცილებელია. ეს იყო კარგი შესაძლებლობა, რომ იმ ადამინებისთვის ევროპარლამენტში, ვინც საგარეო პოლიტიკას განსაზღვრავს, მიგვეწოდებინა შესაბამისი ინფორმაცია საქართველოში მიმდინარე პროცესების შესახებ და განსაკუთრებით ახლა, როდესაც ასოცირების ხელშეკრულების ხელმოწერასთან ასე ახლოს ვართ,“- განაცხადა მაია ფანჯიკიძემ ევროპარლამენტში სიტყვით გამოსვლის დასრულების შემდეგ.
ევროპარლამენტარებთან შეხვედრა კითხვა-პასუხის რეჟიმში წარიმართა.
18.02.14
