ნიდერლანდების სამეფოში საქართველოს ელჩი შოთა ღვინერია, სოფლის მეურნეობის სფეროში ჰოლანდიის მოწინავე რეგიონს, ფრისლანდს ეწვია.
ელჩი რეგიონში არსებულ კერძო კომპანიების წარმომადგენლებს შეხვდა და მათ საქართველოს საინვესტიციო პოტენციალის შესახებ ინფორმაცია მიაწოდა.
ვიზიტის ფარგლებში ელჩი მიიღო ფრისლანდის ვიცე–გუბერნატორმა იოჰანეს კრამერმა. გუბერნატორი კურირებს რეგიონში სოფლის მეურნეობისა და ლოჯისტიკის სფეროების განვითარებას.
გაიმართა შეხვედრა ასევე, აგრარული ბიზნესის და მაღალხარისხიანი რძის წარმოებაში მსოფლიოში ერთ–ერთი წამყვანი კომპანიის “Friesian”–ის გენერალურ–დირექტორთან ლამერტ ფოპმასთან. კომპანია “Friesian”–ი უკვე აწარმოებს მოლაპარაკებებს თანაინვესტირების ფონდთან, საქართველოში ერთობლივი პროექტის განხორციელების მიზნით.
საქმიანი შეხვედრები შედგა ფრისლანდის რეგიონის ბიზნესის წრეების სხვა წარმომადგენლებთან.
შეხვედრები ინდუსტრიისა და დამსაქმებელთა კონფედერაციის ჩრდილოეთ რეგიონის (VNO-NCW Noord) გენერალური მდივანის ლამერტ ზვიერსისა და მეცხოველეობისა და ხორცის მწარმოებელთა კონფედერაციის თავმჯდომარის იოპ ატსმას მხარდაჭერით გაიმართა. შეხვედრაში მონაწილეობა მიიღეს და თანამშრომლობის სურვილი გამოხატეს 7-მა ჰოლანდიურმა კომპანიამ, რომელიც ევროპის ბაზარზე ოპერირებს.
ელჩმა ჰოლანდიელ მეწარმეებს მიაწოდა ინფორმაცია საქართველოს საინვესტიციო პოტენციალის შესახებ და 5–6 მარტს საქართველოს ვიცე პრემიერ–მინისტრისა და ეკონომიკისა და მდგრადი განვითარების მინისტრის გიორგი კვირიკაშვილის ნიდერლანდებში ვიზიტის ფარგლებში დაგეგმილ საჯარო ღონისძიებებში მონაწილეობის მისაღებად მიიწვია.
25.02.14
