დავით კეზერაშვილი ფრანგული სასამართლოს მიერ საქართველოში მის ექსტრადირებაზე უარს ელოდა. ამის შესახებ კეზერაშვილმა სასამართლოს დასრულების შემდეგ ქართველ ჟურნალისტებს განუცხადა.
“ველოდებოდი ამას, რა თქმა უნდა. ძალიან მიხარია, რომ ასეთი გადაწყვეტილება მიიღო საფრანგეთის სასამართლომ. ორივე საქმე ჩემს წინააღმდეგ იყო აბსოლუტურად ხელოვნური”, – განაცხადა კეზერაშვილმა.
ჟურნალისტების კითხვაზე, სასამართლომ ჩათვალა თუ არა, რომ მის წინააღმდეგ საქმე იყო პოლიტიკურად მოტივირებული, კეზერაშვილმა უპასუხა – “რა თქმა უნდა”.
კეზერაშვილის განმარტებით, როგორც მისთვის არის ცნობილი, სასამართლოს ამ გადაწყვეტილების შემდეგ მას თავისუფლად გადაადგილება შეუძლია.
რაც შეეხება მის სამომავლო გეგმებს, კეზერაშვილმა აღნიშნა, რომ “ამას მოიფიქრებს”.
საქართველოს თავდაცვის ყოფილი მინისტრის, დავით კეზერაშვილის ექსტრადირებაზე საფრანგეთის სასამართლომ უარი განაცხადა.
მისივე თქმით, საფრანგეთის სასამართლოს დღევანდელი გადაწყვეტილებით, კეზერაშვილს ელექტრონული სამაჯურიც მოეხსნება.
დავით კეზერაშვილი ქართული მხარის მოთხოვნით საფრანგეთში 2013 წლის 15 ოქტომბერს დააკავეს. საფრანგეთის სასამართლომ იგი პატიმრობიდან ელექტრონული სამაჯურის გამოყენების პირობით გაათავისუფლა.
რაც შეეხება საქართველოში დავით კეზერაშვილის წინააღმდეგ საქმეებს, მის წინააღმდეგ სისხლის სამართლის ორი საქმეა აღძრული, რომელთა განხილვა თბილისის საქალაქო სასამართლოში მიმდინარეობს. ერთი საქმე კონტრაბანდული სპირტის საქმეა, მეორე კი ტელეკომპანია “იმედის” და რიყის ტერიტორიის გასხვისების საქმე, სადაც თავდაცვის ყოფილი მინისტრი ბრალდებულია გიგი უგულავასთან ერთად.
27.02.14
