უკრაინის პრემიერ-მინისტრი არსენი იაცენიუკი ამერიკაში ვიზიტისთვის ემზადება, რომლის დროსაც უმაღლეს დონეზე კონსულტაციებს გამართავს. “ლიგა.ნეტ”-ის ინფორმაციით, ამის შესახებ მან გუშინ, მინისტრთა კაბინეტის რიგგარეშე სხდომაზე განაცხადა.
“მომავალ ოთხშაბათს მინისტრთა კაბინეტის სხდომას ჩემი მოადგილე უხელმძღვანელებს, რადგან ამერიკის შეერთებულ შტატებში მივემგზავრები, სადაც უკრაინაში ვითარების დასარეგულირებლად უმაღლესი დონის კონსულტაციები გაიმართება”, – აღნიშნა პრემიერმა.
იაცენიუკმა ასევე განაცხადა, რომ უკრაინა თავისი ტერიტორიის ერთ სანტიმეტრსაც არ დათმობს და რუსეთთან კონფლიქტს მხოლოდ დიპლომატიური და პოლიტიკური გზით გადაწყვეტს.
“ეს ჩვენი ქვეყანაა. ამ მიწისთვის ჩვენი წინაპრები სისხლს ღვრიდნენ და არც ერთი სანტიმეტრის დათმობას არ ვაპირებთ! იცოდეს ეს რუსეთმა და მისმა პრეზიდენტმა!”, – აღნიშნა იაცენიუკმა.
10.03.14
