მე ასეთი ურთიერთობების მომხრე ვარ, რომ რასაც ორი ადამიანი ილაპარაკებს, აღარ მოვყვე მედიასთან, – ამის შესახებ საქართველოს პრეზიდენტმა , გიორგი მარგველაშვილმა პრეზიდენტის სასახლეში გამართულ პრესკონფერენციაზე განაცხადა.
ამით მარგველაშვილი ბიძინა ივანიშვილის განცხადებას გამოეხმაურა, რომ პრეზიდენტი სასამართლოში მოწმეების დაკითხვის წესის გადავადებასთან დაკავშირებით პარლამენტის მიერ მიღებულ კანონპროექტზე ვეტოს დადებას აპირებდა.
“ბიძინასა და ჩემს შორის დიალოგებს არ მოგიყვებით. ვეტო არის ამბავი გარდასულ დღეთა. არ დავადე იმ კანონს ვეტო. კიდევ ერთხელ ხაზგასმით ვიტყვი, რომ ამ დიალოგებს არ მოვყვები. მინდა რომ გამიგოთ და მიხვდეთ რატომ ხდება ეს. მე ასეთი ურთიერთობების მომხრე ვარ, რომ რასაც ორი ადამიანი ილაპარაკებს, აღარ მოვყვე მედიასთან”, – განაცხადა მარგველაშვილმა.
ყოფილმა პრემიერმა გუშინ განაცხადა, რომ მარგველაშვილი მოწმეების დაკითხვასთან დაკავშირებით პარლამენტის მიერ მიღებულ კანონპროექტზე ვეტოს დადებას აპირებდა.
ივანიშვილის განმარტებით, პირადად მან სცადა გიორგი მარგველაშვილისთვის აეხსნა, რომ ვეტოს გამოყენება უმრავლესობაში გაუგებრობას გამოიწვევდა, რომ ეს გუნდის შეურაცხყოფა იქნებოდა, რაზეც პრეზიდენტმა თქვა, რომ “ეს მას არ აინტერესებს”.
ივანიშვილმა აღნიშნა ისიც, რომ პრეზიდენტს კანონპროექტი წაკითხული არ ჰქონდა, ისე აპირებდა ვეტოს დადებას, დავით უსუფაშვილს კი, დაწყებული ჰქონდა დეპუტატების მობილიზება, რათა ვეტოს დაძლევა გამხდარიყო შესაძლებელი.
19.03.14
