ექსპერტი კახა კახიშვილი მოქალაქეობის მინიჭების საკითხთან დაკავშირებით კანონპროექტს გამოეხმაურა. როგორც დღეს გამართულ ბრიფინგზე კახა კახიშვილმა განაცხადა, გადაწყვეტილება იმის შესახებ, რომ პირისთვის მოქალაქეობის მიცემაზე პრეზიდენტის გადაწყვეტილება პრემიერ-მინისტრის კონტრასიგნაციას დაექვემდებაროს, ცოტა ნაჩქარევია.
“ჩვენ ვცხოვრობთ ახალი მოდელის პირობებში, სადაც პრეზიდენტისა და პრემიერ-მინისტრის უფლებამოსილება სხვაგვარად არის გაწერილი, ვიდრე ჩვენ ვიყავით მიჩვეულები. ამავდროულად, ამ უფლებამოსილებების უფრო დეტალიზაციის მიზნით შეიქმნა სახელმწიფო საკონსტიტუციო კომისია, რომელმაც უნდა დადოს ერთი წლის განმავლობაში კონსტიტუციის ახალი მოდელი და მკვეთრად გამიჯნოს პრეზიდენტის და პრემიერ-მინისტრის და სხვა კონსტიტუციური ინსტიტუტების უფლებამოსილება და კომპეტენცია”, – აღნიშნა კახიშვილმა.
მისივე თქმით, პრემიერ-მინისტრის კონტრასიგნაციის გარეშე მარგველაშვილი 5 კაცზე მეტს მიანიჭებს მოქალაქეობას თუ ნაკლებს, ქვეყანა ამით არ დაინგრევა.
“ასეთი ნაჩქარევი გადაწყვეტილება ეჭვს აღრმავებს საქართველოს მოსახლეობაში, რომ პრეზიდენტსა და პრემიერს შორის არის გარკვეული უთანხმოება გარკვეულ საკითხებში და არის მცდელობა, რომ პრეზიდენტი რაც შეიძლება მეტად უფუნქციოდ დატოვონ”, – განაცხადა ექსპერტმა.
“საქართველოს მოქალაქეობის შესახებ” კანონპროექტი, რომლის ავტორი – იუსტიციის სამინისტრო, ინიციატორი კი მთავრობაა, პარლამენტს იანვრის ბოლოს წარედგინა. პრეზიდენტის ადმინისტრაციამ კი, აღნიშნული დოკუმენტი პარლამენტს 3 თებერვალს მიაწოდა. საუბარია პროცედურაზე, როცა პრეზიდენტის მიერ გამოცემულ აქტს პრემიერ-მინისტრის ხელმოწერა სჭირდება, წინააღმდეგ შემთხვევაში, ძალაში ვერ შევა.
25.03.14