თბილისში, ეროვნული გალერიის წინ, მხატვართა კავშირის ორგანიზებით, აქცია გაიმართა.
აქციის მონაწილეები ეკონომიკის სამინისტროს ქონების დაბრუნებისაკენ მოუწოდებენ. როგორც აქციის მონაწილეები აცხადებენ, ისინი ხელისუფლებისგან აბსოლუტურად იგნორირებულები არიან და მათ არანაირი ყურადღება არ ეთმობათ.
აქციის ერთ-ერთი ორგანიზატორის, მხატვართა კავშირის თავმჯდომარის ცისანა მჭედლიძის განცხადებით, მათი დღევანდელი შეკრების მიზანი იყო, რომ მთავრობისთვის დაენახებინათ მხატვრები არსებობენ და ცოცხლები არიან.
მისივე თქმით, მხატვრებს ძალიან ბევრი პრობლემა დაუგროვდათ, ელემენტარულად მათ საგამოფენო სივრცე არ აქვთ. როგორც მხატვართა კავშირის თავმჯდომარემ აღნიშნა, მხატვრებს ამ თემასთან დაკავშირებით პრემიერ-მინისტრთან შეხვედრა სურთ.
აქციის მონაწილეებს თან ჰქონდათ პლაკატები წარწერით: “ხელოვნება უკვდავია, მთავრობა წარმავალი”, “შეწყდეს ქართული ხელოვნების გენოციდი”, “მხატვრები ეკონომიკის სამინისტროს საკუთრებაა?”, “დაგვიბრუნეთ წართმეული ქონება”.
როგორც აქციის მონაწილეები აცხადებენ, თუ მათი მოთხოვნები არ დაკმაყოფილდება აქცია პერმანენტულ სახეს მიიღებს.
26.03.14
