ფინანსთა სამინისტროსთან ინტერესთა კონფლიქტის გამორიცხვის მიზნით, მიღებულ იქნა გადაწყვეტილება, რომ ფინანსური მონიტორინგის სამსახური ეროვნული ბანკიდან ფინანსთა სამინისტროს დაქვემდებარებაში არ გადავა, – ამის შესახებ ჟურნალისტებს ფინანსთა მინისტრმა ნოდარ ხადურმა “ექსპო ჯორჯიაში” განუცხადა, სადაც საერთაშორისო კონფერენცია “ეკონომიკური ინტეგრაცია ევროკავშირთან – პერსპექტივები და შესაძლებობები” მიმდინარეობს.
“თავიდანვე იყო რამდენიმე ალტერნატივა, ჩვენთვის ძალიან მნიშვნელოვანია ამ სამსახურის დამოუკიდებლობა. დღესაც ეს სამსახური ანგარიშვალდებულია პრემიერის წინაშე, უზრუნველყოფილი იქნება მისი დამოუკიდებლობის ხარისხი”, – განაცხადა ხადურმა.
მისივე თქმით, უამრავი მაგალითი არსებობს იმისა, რომ ეს სამსახური სხვადასხვა ქვეყანაში სხვადასხვა უწყებების ქვეშაა.
“თუმცა, მთავრობის კანონპროექტის ავტორებთან კონსულტაციის შედეგად მიღებული იქნა გადაწყვეტილება, რომ იმის გამო, რომ გამოირიცხოს ინტერესთა კონფლიქტი ფინანსთა სამინისტროში, სჯობს ეს სამსახური იყოს საქართველოს მთავრობის დაქვემდებარებაში”, – განაცხადა ნოდარ ხადურმა.
27.03.14
