საქართველოში ევროკავშირის წარმომადგენლობის ხელმძღვანელის, ელჩ ფილიპ დიმიტროვის განცხადებით, ვინ მოაწერს ხელს ასოცირების შეთანხმებას, კონსტიტუციის საკითხია.
ამის შესახებ დიმიტროვმა “ექსპო ჯორჯიაში” განაცხადა, სადაც საერთაშორისო კონფერენცია “ეკონომიკური ინტეგრაცია ევროკავშირთან – პერსპექტივები და შესაძლებლობები” მიმდინარეობს.
“მნიშვნელოვანი ისაა, რომ ხელი მოეწეროს ასოცირების ხელშეკრულებას. ხოლო მე არ შემიძლია ვუპასუხო შეკითხვას, თუ ვინ უნდა გააკეთოს ეს ხელმოწერა ქართული მხრიდან. ვინ მოაწერს ხელს, ეს კონსტიტუციის საკითხია”, – განაცხადა ფილიპ დიმიტროვმა.
საქართველოს კონსტიტუციით, საერთაშორისო ხელშეკრულებებსა და შეთანხმებებს ხელს პრეზიდენტი აწერს.
კონსტიტუციის 73-ე მუხლის პირველივე პუნქტში, რომელიც პრეზიდენტის უფლებამოსილებებს განსაზღვრავს, ნათქვამია, რომ “საქართველოს პრეზიდენტი მთავრობასთან შეთანხმებით აწარმოებს მოლაპარაკებებს სხვა სახელმწიფოებთან და საერთაშორისო ორგანიზაციებთან, დებს საერთაშორისო ხელშეკრულებებსა და შეთანხმებებს”.
დღეს ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინისტრმა, ალექსი პეტრიაშვილმა განაცხადა, რომ ევროკავშირთან ასოცირების შესახებ ხელშეკრულებას ხელს საქართველოს პრემიერ-მინისტრი მოაწერს. ექსპერტების ნაწილი კი მიიჩნევს, რომ ხელშეკრულებას ხელი საგარეო საქმეთა მინისტრმა ან პრეზიდენტმა უნდა მოაწეროს.
27.03.14
