საქართველოს პრემიერ-მინისტრმა ირაკლი ღარიბაშვილმა, რეგიონული განვითარებისა და ინფრასტრუქტურის მინისტრ დავით ნარმანიასთან ერთად, ხურჩის ახლად დაგებული გზა გახსნა.
როგორც ირაკლი ღარიბაშილმა განაცხადა, “ახალი გზა ენგურს გაღმა მცხოვრები საქართველოს მოქალაქეების გადაადგილებას საგრძნობლად გააუმჯობესებს”.
პრემიერის თქმით, მთავრობა გამყოფი ხაზის გასწვრივ ძველისგან განსხვავებულ, სრულიად ახალ პოლიტიკას ახორციელებს.
“მაქსიმალურად ვცდილობთ, აქ მცხოვრებ მოქალაქეებს ღირსეული ცხოვრების პირობები შევუქმნათ. ენგურს გაღმა მცხოვრებ მოსახლეობაზე ზრუნვა ჩვენი პრიორიტეტია. ამ მიზანს ემსახურება ხურჩის გზა. ეს 4-კილომეტრიანი გზა 3000-ზე მეტ ადამიანს გადაადგილების პირობებს გაუუმჯობესებს”, – განაცხადა საქართველოს პრემიერ-მინისტრმა.
მთავრობის მეთაური ადგილობრივ მოსახლეობას შეხვდა და მათ პრობლემებს გაეცნო. მისი თქმით, სოფლის მეურნეობის გაძლიერება მთავრობის პრიორიტეტია და მთელი ძალისხმევა იქნება მიმართული საიმისოდ, რათა ადგილობრივი წარმოება გაიზარდოს.
02.04.14