ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინისტრის აპარატის ინფორმაციით, დღეს სასტუმრო ,,ამბასადორში”” მინისტრის აპარატის ორგანიზებითა და ევროკავშირის ფინანსური მხარდაჭერით საქართველოს ევროკავშირთან ინტეგრაციის პროცესში მთავარი საკითხების შესახებ მედიის წარმომადგენლებისათვის სემინარი იმართება.
სემინარის მონაწილეებს მისასალმებელი სიტყვით მიმართეს ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინისტრის მოადგილემ მარიამ რაქვიაშვილმა და საქართველოში ევროკავშირის წარმომადგენლობის ხელმძღვანელმა, ელჩმა ფილიპ დიმიტროვმა.
სემინარის მონაწილეებს დეტალური ინფორმაცია მიეწოდებათ ასოცირების შესახებ შეთანხმებისა და მისივე შემადგენელი ღრმა და ყოვლისმომცველი თავისუფალი სავაჭრო სივრცის შესახებ შეთანხმებებზე და ასოცირების დღის წესრიგის განხორციელების მნიშვნელობაზე ქვეყნის ევროკავშირთან ინტეგრაციის პროცესში.
ასოცირების შეთანხმების ტექსტთან დაკავშირებით განმარტებებს აკეთებენ, როგორც საქართველოს აღმასრულებელი ხელისუფლებისა და საქართველოში ევროკავშირის წარმომადგენლობის, დიპლომატიური კორპუსის, ასევე, ბიზნეს წრეების წარმომადგენლები, რომლებიც პრაქტიკულ მაგალითებს იხილავენ.
შეხვედრაზე ერთ-ერთი მთავარ საკითხად განიხილება საქართველოს მთავრობის სტრატეგია ევროინტეგრაციის საკითხთა კომუნიკაციისა და ინფორმაციის შესახებ 2014-2017 წლებისათვის, სადაც განსაკუთრებით მნიშვნელოვანია სემინარის მონაწილეების აქტიური ჩართულობა და ინიციატივები სტრატეგიის უკეთ განხორციელებისათვის.
03.04.14
