ჩვენ არ ვივიწყებთ იმ ადამიანებს, ვინც თავისი სიცოცხლის თავგანწირვით შეძლო თავისუფლების დაცვა, – ამის შესახებ საქართველოს პრეზიდენტმა გიორგი მარგველაშვილმა პრეზიდენტის სასახლეში , 9 აპრილს დაღუპულთა ოჯახის წევრებთან შეხვედრისას განაცხადა.ქვეყნის პირველმა პირმა დაღუპული გმირების ოჯახებს, სამშობლოს წინაშე გამოჩენილი სამაგალითო სამოქალაქო თავდადებისთვის, ეროვნულ-განმათავისუფლებელი მოძრაობისა და დამოუკიდებელი სახელმწიფოსთვის ბრძოლაში შეტანილი წვლილისთვის, წმინდა გიორგის სახელობის გამარჯვების ორდენები გადასცა. ჯილდოსთან ერთად, 9 აპრილს დაღუპულთა ოჯახის წევრები სიმბოლურად 6000-6000 ლარსაც მიიღებენ.
“თქვენ დაკარგეთ თქვენითვის ყველაზე ახლობელი ადამიანები. განსაკუთრებით მადლობას გიხდით, განსაკუთრებით მოგმართავთ იმ ადამიანებს, ვისმა ოჯახებმაც იტვირთეს ჩვენი დღევანდელი გამარჯვების, ჩვენი დღევანდელი სიამაყის ტვირთი. გვინდა გავიხსენოთ იმ ადამიანების სახელები, ვინც თავისი სიცოცხლე ერთ-ერთ ყველაზე მნიშვნელოვან იდეალს შესწირა – იდეალს თავისუფლების. დღეს, გარდაცვალებიდან ბევრი წლის შემდეგ, ვაჯილდოებთ იმ ადამიანებს, რომლებმაც იმ მომენტში გააერთიანა მთელი ერი ამ მაღალი იდეალისთვის”, – განაცხადა მარგველაშვილმა.
09.04.14
