გაწვდით უახლეს ინფორმაციას კაზრეთიდან, სადაც ამ წუთებშიც მიმდინარეობს კარვების აქცია საყდრისის კულტურული მემკვიდრეობის ძეგლის დასაცავად.
დილის საათებში საყდრისის კულტურული ძეგლის მიმდებარე ტერიტორიაზე მიმდინარეობდა სამუშაოები, თუმცა მოგვიანებით გაწვიმდა და სამუშაოებიც შეჩერდა.
როგორც აქციის მონაწილეები აცხადებენ, ტარდება საყდრისის წინა მოსამზადებელი სამუშაოები. ასევე ადგილზე მობილიზებულია პოლიცია.
“ცოტა ხნის წინ, აქციის მონაწილეებს კაზრეთის პოლიციის უფროსიც ესტუმრა, რომელსაც თან ჰქონდა დოკუმენტები და კანონები. პოლიციის უფროსმა ადგილზე დაახლოებით საათნახევარი დაჰყო, მთელი ამ დროის მანძილზე ის აქციის მონაწილეებს აცნობდა აქციის მიმდინარეობის შესაძლო დარღვევებს და უხსნიდა რა სამართლებრივი ფორმით ისჯება თითოეული მათგანი. ასევე, პოლიციის უფროსი აქციის მონაწილეებს დიდი ხნის განმავლობაში უხსნიდა, რომ მათ იქ ყოფნას აზრი არ ჰქონდა და პროტესტის მიუხედავად სამუშაოები მაინც გაგრძელდებოდა. კაზრეთის პოლიციის უფროსი აქციის მონაწილეებთან საუბრისას პარალელურად ინტენსიურ რეჟიმში საუბრობდა მობილურ ტელეფონზე და გადაცემდა ინფორმაციებს“ – ამის შესახებ აცხადებენ აქციის მონაწილეები.
ისინი მიიჩნევენ, რომ ადგილობრივი, კაზრეთის პოლიციის უფროსი კერძო ინტერესების დამცველია და კომპანიის პოზიციის ინტერესების შესაბამისად მოქმედებს.
ადგილობრივი და მიმდებარე სოფლის მოსახლეობა პერიოდულად სტუმრობს კარვების აქციის მონაწილეებს. მიმდინარეობს დამეგობრების პროცესი, მოსახლეობამ აქციის მონაწილეებს საკვებიც მიაწოდა.
მოსახლეობა აქციას გვერდში დგომას აღუთქვამს და პროტესტს გამოხატავს საყდრისის ძეგლზე მიმდინარე პროცესების გამო, რადგანაც ადგილობრივების ნაწილი ფიქრობდა, რომ საყდრისის ძეგლი დაცული იქნებოდა სამართლებრივი ნორმებით და სამუშაოები არ დაიწყებოდა.
რაც შეეხება უშუალოდ აქციის მონაწილეებს, ხდება მათი ადგილზე მონაცვლეობა, ნაწილმა უკვე დატოვა აღნიშნული ტერიტორია, თუმცა თბილისიდან მათ ახალი ნაკადი შეუერთდა.
ახალგაზრდები გეგმავენ ადგილობრივ სასულიერო პირებთან კონტაქტს, ისინი ყოველ დილა საღამოს ლოცულობენ და დიდ ხუთშაბათსა და წითელ პარასკევს ადგილობრივ ტაძარში აპირებენ წასვლას.
გაცნობებთ, რომ კარვების აქციის მონაწილეები აღდგომის ბრწყინვალე დღესასწაულსაც კაზრეთში შეხვდებიან და ცდილობენ დაიცვან მძიმე მარხვის მკაცრი ტიპიკონი.
როგორც მონაწილეები აცხადებენ, იყო სხვადასხვა პრობლემები და ჭორები, რომლებმაც ხელი შეუშალა აქციის კარგად ორგანიზებას, თუმცა ყველაფრის მიუხედავად პროცესები მშვიდად მიმდინარეობს და ახალგაზრდები კვლავ მოითხოვენ 3 ძირითადი მოთხოვნის დაკმაყოფილებას, რომელიც წინ უძღოდა კარვების აქციას. ახალგაზრდები აქციიდან მთელ საზოგადოებას გვერდში დგომისკენ და დახმარებისკენ მოუწოდებენ.
15.04.14