ჟენევის მოლაპარაკებებისას მიღწეული შეთანხმების განსახორციელებლად შემდეგი რამდენიმე დღე გადამწყვეტი პერიოდი იქნება ყველა მხარისთვის , – ამის შესახებ აშშ-ის სახელმწიფო მდივანმა ჯონ ქერიმ რუსეთის საგარეო საქმეთა მინისტრ სერგეი ლავროვთან საუბრისას განაცხადა.
ამასთან, სატელეფონო საუბრისას ჯონ ქერიმ კიდევ ერთხელ გაუსვა ხაზი, რომ უკრაინაში მოქმედმა ყველა უკანონო შეიარაღებულმა დაჯგუფებამ იარაღი უნდა ჩააბაროს და დაუბრუნოს ლეგიტიმურ მფლობელებს უკანონოდ დაკავებული შენობები.
თავის მხრივ, როგორც კრემლის მიერ გავრცელებულ განცხადებაშია ნათქვამი, სერგეი ლავროვმა ყურადღება გაამახვილა უკრაინული მხარის მიერ ჟენევის დეკლარაციის დებულებების დროულ და სრულ შესრულებაზე.
“კერძოდ, უკრაინულმა მხარემ უარი უნდა თქვას ძალადობრივ ქმედებებზე და წამოიწყოს საერთო ეროვნული დიალოგი ახალი კონსტიტუციის თაობაზე, ყველა რეგიონისა და პოლიტიკური ძალის მონაწილეობით”, – ნათქვამია კრემლის მიერ გავრცელებულ განცხადებაში.
ამასთან, უკრაინული მედიის ცნობით, გუშინ რუსეთის საგარეო საქმეთა სამინისტრომ უკრაინული მხარისგან მოითხოვა, რომ მოახდინოს “მემარჯვენე სექტორისა” და მაიდნის სხვა აქტივისტების განიარაღება. უკრაინის საგარეო საქმეთა სამინისტროს განცხადებით კი, ე.წ. ჟენევის დებულებებში მაიდანი არ მოიაზრება.
19.04.14
