რეგიონული განვითარებისა და ინფრასტრუქტურის მინისტრს ახალი მოადგილე ჰყავს. ეს თანამდებობა თემურ მურღულიამ დაიკავა.
თემურ მურღულია 1975 წლის 26 აპრილს დაიბადა. 1997 წელს დაამთავრა ქუთაისის აკ. წერეთლის სახელობის სახელმწიფო უნივერსიტეტის ეკონომიკის ფაკულტეტი, 2002 წელს კი, საქართველოს ეკონომიკისა და სოციალური პრობლემების კვლევითი ინსტიტუტში ეკონომიკის დოქტორის ხარისხი მიენიჭა.
მინისტრის მოადგილის თანამდებობის დაკავებამდე, 2013 წლიდან, თემურ მურღულია საქართველოს მუნიციპალური განვითარების ფონდის აღმასრულებელი დირექტორის პირველი მოადგილე გახლდათ. 2011-2013 წლებში მუშაობდა ეკონომიკური პრობლემების კვლევის ცენტრში (CEPR) მდგრადი განვითარების სექტორის კურატორად. 2010-2011 წლებში გახლდათ პარლამენტის გაძლიერების პროგრამის (AECOM) ბიუჯეტისა და საპარლამენტო ზედამხედველობის ჯგუფის ლიდერი (ბაღდადი, ერაყი); 2008-2010 წლებში – ეკონომიკური პრობლემების კვლევის ცენტრის (CEPR) მთავარი ანალიტიკოსი; 2006-2008 წლებში იყო პარლამენტის აპარატის უფროსის მოადგილე და პარლამენტის საბიუჯეტო ოფისის დირექტორი, 2005-2006 წლებში – პარლამენტის საფინანსო დეპარტამენტის უფროსი; 2004-2005 წლებში მუშაობდა საფინანსო დეპარტამენტის უფროსად საქართველოს თავდაცვის სამინისტროში, 2002-2004 წლებში გახლდათ ამავე სამინისტროს ზურგის მთავარი სამმართველოს მოადგილე და ფინანსური ადმინისტრაციის უფროსი, 2001-2002 წლებში – საქართველოს ეროვნული ბანკის მეორადი ბაზრის სექტორის უფროსი, 1999-2001 წლებში – ფინანსთა სამინისტროს იმერეთის ხაზინის უფროსის მოადგილე, ხოლო 1995-1999 წლებში – ეროვნული ბანკის ქუთაისის ფილიალში წამყვანი ეკონომისტის თანამდებობა ეკავა.
თემურ მურღულია არის არაერთი სამეციერო ნაშრომის ავტორი ეკონომიკის სფეროში. იგი სრულყოფილად ფლობს ინგლისურ და რუსულ ენებს.
28.04.14
