განსაკუთრებით მძიმე მდგომარეობაში არსებულ ობიექტებზე, სადაც დევნილები არიან ჩასახლებული, სიტუაცია არ გამოსწორებულა , – ამის შესახებ სახალხო დამცველის ანგარიშში “დევნილთა და კონფლიქტით დაზარალებულ პირთა უფლებრივი მდგომარეობა საქართველოში” არის ნათქვამი. სახალხო დამცველის ინფორმაციით, ყურადღებას იმსახურებს რამდენიმე ობიექტი, მათ შორის: თბილისში ნინუას ქუჩაზე, დადიანის ქუჩაზე, ჟორესის ქუჩაზე არსებული შენობები.
სახალხო დამცველის ინფორმაციით, განსაკუთრებით მძიმე ვითარეებაა დაბა ცხვარიჭამიაში მდებარე ყოფილ ტურბაზა “სიჭაბუკეში”. შენობაში არ არსებობს საკანალიზაციო სისტემა, დევნილებს არ მიეწოდებათ ბუნებრივი აირი და წყალი, დაზიანებულია სახურავი და საყოფაცხოვრებო ნარჩენებისგან გასაწმენდია მიმდებარე ტერიტორია. შენობაში შექმნილია ანტისანიტარიული მდგომარეობა, რაც სახალხო დამცველის ინფორმაციით, საფრთხეს უქმნის კოლექტიურ ცენტრში მცხოვრები პირების ჯანმრთელობას.
ანგარიშის თანახმად, უმძიმესი ვითარებაა ხაშურში, სანატორიუმ “სურამის” ძველ კორპუსში, სადაც აფხაზეთის იძულებით გადაადგილებული პირები არიან ჩასახლებული. შენობა რეაბილიტაციას არ ექვემდებარება. ასეთსავე მძიმე მდომარეობაში არიან ყოფილი ნარკოლოგიური კომბინატის პოლიკლინიკაში ჩასახლებული დევნილები, რომელთა უმთავრესი პრობლემა სველი წერტილების არარსებობა და მცირე საცხოვრებელი ფართებია.
მძიმე პირობებში არიან სანატორიუმ “ქართლი 96”-ში მცხოვრები დევნილებიც. სახალხო დამცველის ინფორმაციით, ასევე მძიმე მდგომარეობაშია ქუთაისში, სენაკში, ზუგდიდში, სურამში არსებული რამდენიმე შენობა.
30.04.14
