საქართველოს ფინანსთა მინისტრი ნოდარ ხადური გერმანიის ეკონომიკური თანამშრომლობისა და განვითარების ფედერალური მინისტრის საპარლამენტო მდივანს ჰანს-იოახიმ ფუხტელს შეხვდა შეხვდა.
ფინანსთა სამინისტროს ინფორმაციით, მხარეებმა განიხილეს ქართულ-გერმანული ურთიერთობების დინამიკა. ისაუბრეს იმ პროექტების მნიშვნელობაზე, რომელსაც გერმანიის მთავრობა ახორციელებს გერმანიის რეკონსტრუქციის საკრედიტო ბანკისა (KFW) და გერმანიის საერთაშორისო თანამშრომლობის საზოგადოების (GIZ) დახმარებით.
გერმანული მხარის მიერ საქართველოში მხარდაჭერილი პროექტები მოიცავენ როგორც ინფრასტრუქტურის სფეროს, ისე ინსტიტუციურ რეფორმებს.
შეხვედრაზე ისაუბრეს საქართველოში გერმანული ინვესტიციების მოზიდვის მნიშვნელობაზე, განსაკუთრებით, საშუალო და მცირე ბიზნესის განვითარების მიმართულებით. მოლაპარაკებისას, კიდევ ერთხელ ხაზი გაესვა იმ პოლიტიკური მხარდაჭერის მნიშვნელობას, რომელსაც გერმანიის მთავრობა გამოხატავს საქართველოსადმი.
მხარეებს შორის გამართულ შეხვედრაზე აღინიშნა, რომ ევროკავშირთან ასოცირების ხელშეკრულებაზე ხელმოწერა, ახალი სტიმული იქნება საქართველოში ინვესტიციების მოზიდვისათვის და გახდება ეკონომიკის განვითარების ხელშემწყობი ფაქტორი.
01.05.14
