საყდრისის გადარჩენის კომიტეტი მოწვეული უცხოელი ექსპერტების კომპანია “RMG გოლდთან” კავშირებზე საუბრობს.
როგორც დღეს გამართულ პრესკონფერენციაზე საყდრისის გადარჩენის კომიტეტის წევრმა, ხელოვნებათმცოდნე სოფო კილასონიამ აღნიშნა, ერთ-ერთი მოწვეული სპეციალისტი, “RMG გოლდის” კონტრაქტორი გეოლოგის შერჩეული და მოწვეულია.
ამასთან, სოფო კილასონიას ინფორმაციით, სხვადასხვა დროს კომიტეტმა საქართველოს პრემიერ-მინისტრთან რამდენიმე წერილი შეიტანა.
“ყოველ ამ წერილზე კანცელარია გვპასუხობს, რომ პრემიერი არ განიხილავს ამ საკითხს და არ შეგვხდება”, – აღნიშნა სოფო კილასონიამ.
მისივე შეფასებით, ეს არის ძალიან სამწუხარო ტენდენცია, როდესაც მყარ არგუმენტებზე დაყრდნობის გარეშე, საქართველოს სახელმწიფოს ხელმძღვანელი არ განიხილავს საკითხს, რომლის განხილავასაც მას საზოგადოების ძალიან დიდი ნაწილი თხოვს. ამასთან, როგორც კომიტეტის წევრმა აღნიშნა, რამდენიმე დღეში პრემიერთან კიდევ ერთი წერილი – უნდობლობის პეტიცია შევა, რომელსაც კულტურის სფეროს 500-მა წარმომადგენელმა მოაწერა ხელი. მისი განმარტებით, წერილში საუბარია იმ კანონდარღვევებზე, რომელსაც კულტურისა და ძეგლთა დაცვის სამინისტრო ერთი წლის განმავლობაში ახორციელებს.
“ეს არის კიდევ ერთი მცდელობა, რომ საქართველოს პრემიერი დაფიქრდეს იმაზე, რომ თუნდაც წავიდეს დიალოგზე საზოგადოების ამ ნაწილთან. ჩვენ იმედი გვაქვს, რომ ის ამ გადაწყვეტილებას მიიღებს და უბრალოდ ესაუბრება მაინც ამ საზოგადოებას. თუ იგივე წერილს ან იგივე პასუხს მივიღებთ, რომ ეს საკითხი ისევ არ განიხილება, მაშინ ჩვენ გვაინტერესებს ვის სასარგებლოდ ღებულობს ის ამ გადაწყვეტილებას. მაშინ ვისაუბროთ ვისია “RMG გოლდი”. პირად საუბრებში ამ კომპანიის წარმომადგენლები უკვე გვიდასტურებენ, რომ ეს არის რუსული კომპანია, მაგრამ სახელს არ ამბობენ”, – აღნიშნა სოფო კილასონიამ.
საყდრისის გადარჩენის კომიტეტის წევრი, ნინო საღინაძე მეტი გამჭვირვალობის აუცილებლობაზე საუბრობს. მისი ინფორმაციით, უცხოელ სპეციალისტებთან ერთად ადგილის მოსანახულებლად სამი ქართველი არქეოლოგი უნდა წასულიყო, თუმცა სააგენტომ მხოლოდ ერთი არქეოლოგი – ირინა ღამბაშიძე წაიყვანა. ამასთან მისივე ინფორმაციით, გასულ დღეებში საყრდრისის ბორცვზე ხის საფარის ჭრა მიმდინარეობდა და ყოველდღიურად ობიექტის დაზიანება ხდება.
კომიტეტის კიდევ ერთი წევრის, ილია მახარაძის ცნობით, საყდრისის გადარჩენის კომიტეტი დღეს, 15:00 საათზე, თბილისში, პარლამენტის შენობასთან აქციას გამართავს.
ისინი საყდრისში სამუშაოების შეჩერებასა და საერთაშორისო კომისიის ფართო შემადგენლობით ჩამოყალიბებას მოითხოვენ.
09.05.14
