საქართველოს პრემიერ-მინისტრმა ირაკლი ღარიბაშვილმა ვაკის პარკში უცნობი ჯარისკაცის საფლავი გვირგვინით შეამკო.
პრემიერი ვაკის პარკში სრულიად საქართველოს კათოლიკოს-პატრიარქ უწმინდესსა და უნეტარეს ილია მეორესთან ერთად იმყოფებოდა. ღარიბაშვილმა უცნობი ჯარისკაცის საფლავთან შეკრებილ მოქალაქეებს სიტყვითაც მიმართა და მათ ფაშიმზე გამარჯვების 69-ე წლისთავი მიულოცა.
“მოგილოცავთ დღევანდელ დღეს, ესაა კაცობრიობის ისტორიაში ერთ-ერთი უმნიშვნელოვანესი დღე – დღე ფაშიზმზე გამარჯვების. მინდა ეს დღე დიდი პატივისცემით და სიყვარულით მივულოცო განსაკუთრებით ჩვენს ვეტერანებს. ფაშიზმზე გამარჯვება ესაა დღე, რომლის მიღწევაში ჩვენს თანამოქალაქეებს უდიდესი წვლილი აქვთ შეტანილი. ვიცით, რომ დაახლოებით 300 000 ჩვენი თანამოქალაქე იბრძოდა და გმირულად დაიღუპა მეორე მსოფლიო ომში, მხოლოდ ქერჩის ბრძოლაში 120 000 ქართველი დაეცა გმირულად. მე როგორც რიგითი მოქალაქე ქედს ვიხრი მათი უკვდავი სულების წინაშე და დღეს აქ მოვედი იმისთვის, რომ პატივი მივაგო მათ ხსოვნას, – განაცხადა ირაკლი ღარიბაშვილმა.
მისივე განმატრებით, ყველა ცივილიზებული სამყაროს ვალია, რომ საკუთარ ვეტერანებზე იზრუნოს.
“თუ ჩვენ გვაქვს ამბიცია და პრეტენზია, რომ გავხდეთ თანამედროვე სახელმწიფო, ვეტერანებზე უნდა ვიზრუნოთ. ჩვენი მთავრობა შესაძლებლობის ფარგლებში ყველაფერს აკეთებს, რომ ვეტერანების მდგომარეობა გავაუმჯობესოთ. 69-ე წლისთავთან დაკავშირებით ჩვენმა მთავრობამ გამოყო 400-ლარიანი დახმარება ვეტერანებისთვის და 200-ლარიანი დახმარება მარჩენალდაკარგული ოჯახებისთვის. ვიცით, რომ ეს არ არის საკმარისი, მაგრამ ვცდილობთ, რომ მათი მდგომარეობა გახდეს უკეთესი. ჩვენი ვალია, რომ მათი ჯანდაცვა იყოს უფრო მაღალი ხარისხის და იცით, რომ ამოქმედდა ჯანდაცვის სახელმწიფო პროგრამა, რომელიც ვეტერანებისთვის სამედიცინო მომსახურებას 100%-ით ფარავს”, – განაცხადა ღარიბაშვილმა.
09.05.14
