ევროპულ და ევროატლანტიკურ სტრუქტურებში ინტეგრაციის საკითხებში საქართველოს სახელმწიფო მინისტრი ალექსი პეტრიაშვილი სლოვაკეთის რესპუბლიკაში გაემგზავრა, სადაც სპეციალური სტუმრის სტატუსით დედაქალაქ ბრატისლავაში მიმდინარე ყოველწლიურ „გლობალური უსაფრთხოების“ ფორუმის მუშაობაში მიიღებს მონაწილეობას. წლევანდელ ფორუმს სხვადასხვა ქვეყნების მაღალი დონის წარმომადგენლები,მათ შორის ნატო-ს გენერალური მდივანი ანდერს ფოგ რასმუსენი, უკრაინის პრემიერ-მინისტრი არსენ იაცენუკი და ლიტვის საგარეო საქმეთა მინისტრი ლინას ლინკევიჩიუსი ესწრებიან.
ალექსი პეტრიაშვილი ვიშეგრადის ქვეყნების წარმომადგენლებთან ერთად მონაწილეობას მიიღებს ფორუმის ფარგლებში გამართულ დისკუსიაში და სიტყვით გამოვა სამუშაო სადილზე „აღმოსავლეთ პარტნიორობის რეალობა: არჩევანი ორ გაერთიანებას შორის?“ (EaP Reality Check: Between Two Unions?).
ვიზიტის ფარგლებში, ასევე, დაგეგმილია სახელმწიფო მინისტრის ინტერვიუები წამყვან საერთაშორისო მედია საშუალებებთან.
“გლობალური უსაფრთხოების“ (GLOBSEC) ფორუმი მსოფლიოს ერთ-ერთი მნიშვნელოვანი ტრანსატლანტიკური კონფერენციაა, სადაც საგარეო-პოლიტიკური და უსაფრთხოების საკითხები განიხილება და მასში ყოველწლიურად ამერიკისა და ევროპის ქვეყნების 800-მდე მაღალი დონის წამომადგენელი (პოლიტიკოსები, ექსპერტები, არასამთავრობო სექტორი, საერთაშორისო ორგანიზაციები, აკადემიური წრეები და მედია) მონაწილეობს. ფორუმს სლოვაკეთის დედაქალაქი ბრატისლავა 2007 წლიდან მასპინძლობს.
15.05.14
