თბილისი თაიმსისთვის ცნობილი გახდა, რომ ამ წუთებში ომარ ქუცნაშვილსა და გიორგი მიქანაძეს შორის საყდრისის თაობაზე შელაპარაკება მოხდა. შეგახსენებთ, რომ ომარ ქუცნაშვილი გახლავთ მეცნიერი, რომელმაც საყდრისისათვის ძეგლის სტატუსის მოხსნის თაობაზე ხელი მოაწერა, ის ასევე პარლამენტარ ზაქარია ქუცნაშვილის მამა გახლავთ. ბატონი ომარი მეცნიერთა მხრიდან განსაკურებით გამორჩევა, რომელიც მიიჩნევს, რომ საყდრისი არაფერი ღირებული არ არის. გიორგი მიქანაძე გახლავთ საყდრისის გადარჩენის საზოგადოებრივი კომიტეტის წევრი. როგორც ვრცელდება ინფორმაცია გიორგი მიქანაძე მივიდა შეხვედრაზე, სადაც საქართველოს 50 წლიანი განვითარების გეგმა განიხილებოდა და შელაპარაკება სწორედ იქ მოხდა. ჩვენ ინფორმაციის გადამოწმებისთვის საყდრისის გადარჩენის საზოგადოებრივი კომიტეტის წევრს, გიორგი მიქანაძეს დავუკავშირდით, მან ეს ინფორმაცია დაადასტურა:
“დიახ, როდესაც გავიგე, რომ იქ იმყოფებოდნენ სანდრო თვალჭრელიძე და ომარ ქუცნაშვილი, სხვა მეცნიერებთან ერთად, მე გადავწყვიტე მივსულიყავი და მეკითხა, თუ რატომ ანგრევენ საყდრისს და რატომ აწერენ ხელს ასეთ მოღალატეობრივ დოკუმენტებს. საინტერესოა რატომ თხზავენ და იგონებენ არგუმენტებს საქართველოს ინტერესების საწინააღმდეგოდ. შელაპარაკება არ ვიცი თუ ერქვა ამას, თუმცა ცოტა ხმამაღლა კი ვესაუბრე. დამსწრე საზოგადოებას ბოდიში მოვუხადე, მათ ეს საკითხი არ ეხებოდათ, თუმცა რატომაც არა საყდრისის საკითხზე ყველამ უნდა ამოიღოს ხმა. ომარ ქუცნაშვილმა აღიარა, რომ საყდრისი უძველესი არქეოლოგიური ობიექტია, რომ ის შეიძლება იმაზე ძველიც კი იყოს, ვიდრე ამაზე მეცნიერები საუბრობენ, თუმცა ეს არ ყოფილა ოქრო, მან ასე მითხრა. არადა ის, რომ იქ კულტურული ფენა იყო, ამას ყველა უარყოფდა, სიტუაციებს ისე ატრიალებენ როგორც აინტერესებთ. ვიდრე ძეგლთა დაცვის სააგენტოს მიერ მოწვეულმა ბულგარელმა და გერმანელმა ექსპერტმა არ დადო დასკვნა, რომ ეს ძეგლია და რომ მას სასწრაფოდ სტატუსი უნდა მიენიჭოს. მე ვუთხარი, რომ ყველა ადამიანი მოღალატეა, ვინც საყდრისის ნგრევას უწყობს ხელს და გადავეცი, რომ ახალგაზრდები და მთელი საზოგადოება აღშფოთებულია მისი და რამოდენიმე მეცნიერის ქმედებით საყდრისთან დაკავშირებით. შესაბამისად არც ეს 50 წლიანი გეგმა უნდა იყოს სანდო, თუ ასეთი ადამიანების შემუშავებულია. ვუთხარი ასევე, რომ საყდრისს აღიარებს მთელი მსოფლიო, რომ სააგენტოს ჩამოყვანილმა ექსპერტებმაც კი აღიარეს საყდრისის უძველესი ძეგლი და რომ იქ სწორედ ოქროს მოიპოვებდნენ. ამაზე დაიბნა, საყდრისის დამანგრეველი და თქვა არ მაინტერესებს რას წერენ და აკეთებენ სააგენტოები და არასამთავრობო ორგანიზაციებიო. არ ვიცი ეს რა შუაში იყო. თქვა ასევე, რომ საქართველოს მსოფლიოში ყველაზე ძლიერი გეოლოგიური სკოლა აქვს და არ აინტერესებს თუ რა პოზიცია ექნება საყდრისთან დაკავშირებით დანარჩენ მსოფლიოს. ფაქტიურად მანაც აღიარა საყდრისის უნიკალურობა და უძველესობა. ალბათ, პრობლემა მას იმაში აქვს იქ ოქროს მოიპოვებდნენ თუ არა. კომიკურია მეცნიერის პოზიცია, რომელიც საერთაშორისო სამეცნიერო ინსტიტუციების მიერ აღიარებულ ფაქტებს არასანდოს უწოდებს. სანდრო თვალჭრელიძე იქ არ ბრძენდებოდა თორემ, მასაც გავაცნობდი ჩემს მოქალაქეობრივ პოზიციას. გული მწყდება, როდის უნდა დამთავრდეს საქართველოში მსგავსი ფაქტები. ეს ალბათ იმის ბრალია, რომ სამოქალაქო საზოგადოება სუსტია ჩვენს ქვეყანაში და ვისაც რა უნდა იმას წერს და აღასრულებს. დიდი იმედი მაქვს, რომ ეს ასე არ გაგრძელდება და მალე დაესმება წერტილი. საყდრისის დამანგრევლები მალე უნდა დაისაჯნონ, აუცილებლად უნდა შეიქმნას პრეცედენტი, რომ მომავალში აღარ განმეორდეს მსგავსი ვანდალური ფაქტები!” – აცხადებს გიორგი მიქანაძე.
შეგახსენებთ, რომ საყდრისთან დაკავშირებით განსაკუთრებული აქტიურობა სამოქალაქო საზოგადოებამ ბოლო ორი თვეა რაც დაიწყო. 46-ე დღეა რაც საყდრისში კარვების აქცია მიმდინარეობს. თვითონ თემა აქტუალური გახდა მას შემდეგ, რაც ძეგლს დაახლოებით ერთი წლის წინ სტატუსი მოუხსნეს.
