აფხაზეთის საოკუპაციო რეჟიმის ლიდერი სოხუმში მიმდინარე მოვლენებს ხელისუფლების ხელში ჩაგდების მცდელობად აფასებს.
ალექსანდრე ანქვაბი უარყოფს ინფორმაციას იმის შესახებ, რომ აფხაზეთი დატოვა და ამბობს, რომ ამ დროისთვის არსებულ მდგომარეობას ე.წ. უშიშროების საბჭოსთან ერთად განიხილავს.
ანქვაბის თქმით, შეიარაღებული ადამიანების ჯგუფმა ტელევიზიის შენობაც დაიკავა. მათთვის წინააღმდეგობა არ გაუწევიათ დაცვის წევრებს.
ე.წ. ხელისუფლების ადმინისტრაციის შენობაში რჩება ოპოზიცია. აფხაზური ე.წ. ოპოზიციის ლიდერი რაულ ხაჯინბა აცხადებს, რომ ოპოზიციური პარტიების საკოორდინაციო საბჭო დე ფაქტო რესპუბლიკის ხელმძღვანელობას საკუთარ თავზე იღებს. უკვე ცნობილია, რომ ანქვაბი საოკუპაციო რეჟიმის ე.წ. მინისტრთა კაბინეტის გადადგომას დათანხმდა.
სოხუმში ე.წ. ოპოზიციის მრავალათასიანი აქცია გუშინ გაიმართა. მომიტინგეები ე.წ. მთავრობას კორუფციასა და რუსეთთან არასაკმარის ინტეგრაციაში ადანაშაულებდნენ.
28.05.14