ავღანეთში საქართველოს შეიარაღებული ძალების კონტინგენტი 2015 წლის 1-ელი იანვრიდან განახევრდება, – ამის შესახებ გუშინ, უსაფრთხოებისა და კრიზისების მართვის საბჭოს სხდომის დასრულების შემდეგ ჟურნალისტებს საბჭოს მდივანმა მინდია ჯანელიძემ განუცხადა.
ჯანელიძის ინფორმაციით, ეს საკითხი უსაფრთხოებისა და კრიზისების მართვის საბჭოს სხდომაზე განიხილეს.
“ჩვენი კანონმდებლობის შესაბამისად, ამას ესაჭიროება სათანადო პროცედურები. ამ საკითხში აუცილებლად იქნება ჩართული საქართველოს პრეზიდენტი, შესაბამისად, უშიშროების საბჭო და პარლამენტი. თუმცა არსებობს გეგმა, მონახაზი, რომ 1-ელი იანვრიდან საქართველოს შეიარაღებული ძალების კონტინგენტი განახევრდება და შეადგენს დაახლოებით 700 სამხედრო მოსამსახურეს”, – აღნიშნა მინდია ჯანელიძემ.
09.06.14
