საქართველოს პროკურატურამ საარჩევნო სუბიექტების მიმართ განხორციელებული შესაძლო ზეწოლის 80 ფაქტი გამოიკვლია.
პროკურატურის განცხადებით, პოლიტიკური პარტიების და არასამთავრობო ორგანიზაციების, ასევე მედიასაშუალებებით გავრცელებული ინფორმაციის ნამდვილობის გადამოწმების მიზნით გამოიკითხა 100-ზე მეტი პირი, რომელთა შორის იყვნენ არამხოლოდ შესაძლო ზეწოლის ე.წ. მსხვერპლები, არამედ ყველა ის პირი, რომელსაც მითითებულ ფაქტებთან დაკავშირებით გააჩნდა რაიმე სახის ინფორმაცია.
პროკურატურის ინფორმაციით, ამასთანავე, საქართველოს პროკურატურის თანამშრომლებმა უშუალოდ მოახდინეს იმ ფაქტების გადამოწმება, სადაც შესაძლო მუქარასა და ზეწოლაში სამართალდამცავი ორგანოების თანამშრომლებს ამხელდნენ.
“მაღალი საზოგადოებრივი ინტერესიდან გამომდინარე, გვინდა გავასაჯაროოთ შედეგები – 80 შემთხვევიდან 76 შემთხვევაში საარჩევნო სუბიექტებმა გამოკითხვისას არ დაადასტურეს გავრცელებული ინფორმაცია სამართალდამცავი ორგანოების წარმომადგენელთა ან სხვა პირთა მხრიდან ზეწოლის შედეგად კანდიდატურის მოხსნის შესახებ და კანდიდატურის მოხსნის მიზეზად სხვადასხვა პირადი (ოჯახური მდგომარეობა, ასაკი, გადატვირთულობა და ა.შ.) მოტივი დაასახელეს. აქვე გაცნობებთ, რომ პირის გამოკითხვა არის ნებაყოფლობითი ხასიათის მოქმედება, რომელიც მიზნად ისახავს მომხდარი ფაქტების ირგვლივ განმარტების მიღებას.
მათ შორის, პროკურატურამ გამოიკვლია უწყებათშორის საბჭოს სხდომაზე გაჟღერებული საკითხი შალვა გოლოშვილის მიმართ ზეწოლის შემთხვევის ფაქტზე, რომლის შესახებ “ახალგაზრდა იურისტთა ასოციაციას” პოლიტიკური პარტია “თავისუფალი დემოკრატების” წევრმა თამაზ მაყაშვილმა განუცხადა. გამოკითხვისას სამართალდამცავი ორგანოების მხრიდან რაიმე ფორმით ზეწოლის ფაქტი უარყო როგორც შალვა გოლოშვილმა, ისე თამაზ მაყაშვილმა, რომლის გამოკითხვასაც ესწრებოდა “ახალგაზრდა იურისტთა ასოციაციის” წარმომადგენელი. თამაზ მაყაშვილმა ასევე განმარტა, რომ ზეწოლის ფაქტთან დაკავშირებით “ახალგაზრდა იურისტთა ასოციაციის” წარმომადგენელთან მხოლოდ ვარაუდი გამოთქვა”, – აცხადებენ პროკურატურაში.
მათივე ინფორმაციით, 4 შემთხვევაში დაიწყო გამოძიება საქართველოს სსკ-ის 150-ე მუხლით, რაც გულისხმობს ადამიანის ქმედების თავისუფლების უკანონო შეზღუდვას, ანუ მის ფიზიკურ ან ფსიქიკურ იძულებას, შეასრულოს ან არ შეასრულოს მოქმედება, რომლის განხორციელება ან რომლისაგან თავის შეკავება მის უფლებას წარმოადგენს, ან საკუთარ თავზე განიცადოს თავისი ნება-სურვილის საწინააღმდეგო ზემოქმედება.
საგამოძიებო უწყების ცნობით, გამოძიება გრძელდება მუქარისშემცველი ზარების ავტორების და იმ პირთა ვინაობის დასადგენად, რომლებიც შესაძლოა ფლობდნენ რაიმე ინფორმაციას მომხდარ ფაქტთან დაკავშირებით.
“პროკურატურა ასევე დაინტერესდა სოფელ უდეში მომხდარი სავარაუდო ზეწოლის ფაქტებითაც. გამოიკითხნენ როგორც საარჩევნო კანდიდატები, რომლებმაც გავრცელებული ინფორმაცია ზეწოლის შედეგად კანდიდატურების მოხსნის შესახებ არ დაადასტურეს, რაზეც შედგა შესაბამისი დოკუმენტაცია.
პროკურატურის მიერ სხვა საკითხთა შორის შესწავლილი იქნა მედიასაშუალებით გავრცელებული ინფორმაცია “ერთიანი ნაციონალური მოძრაობიდან” ოზურგეთის დეპუტატობის კანდიდატის – კახა კილაძის მიერ კანდიდატურის მოხსნის შესახებ. გამოკითხვისას კახა კილაძემ განმარტა, რომ კანდიდატურა თავიდავე ფორმალურად დააყენა მისი მეგობრის – “ერთიანი ნაციონალური მოძრაობის” ოზურგეთის რაიონული ორგანიზაციის თავმჯდომარის – მიხეილ გოგოტიშვილის თხოვნით, რომელმაც მას აუხსნა, რომ რეგისტრაცია ფორმალურ ხასიათს ატარებდა და ნებისმიერ დროს შეეძლო კანდიდატურის მოხსნა”, – აცხადებენ პროკურატურაში.
პროკურატურა აგრძელებს მსგავსი ფაქტების გამოკვლევას და აცხადებს, მზაობას შესწავლილი იქნას ნებისმიერი ფაქტი, რომელიც შესაძლოა შეიცავდეს რაიმე სახის სამართალდარღვევას, რის შესახებაც საზოგადოებას დამატებით აცნობებს.
პროკურატურა ასაჯაროებს ზემოაღნიშნული ფაქტების ამსახველი გამოკითხვის ოქმების ნაწილს, რომელიც უწყების განცხადებით, გამოსაკითხი პირების მიერ ნებაყოფლობით მიცემულ განმარტებებს ასახავს.
12.06.14
