გიორგი მარგველაშვილი: “კიდევ ერთი ენერგიული ნაბიჯი გადაიდგა ქვეყნის შემდგომი წინსვლისა და განვითარებისკენ”

საქართველოს პრეზიდენტი გიორგი მარგველაშვილი მოსახლეობას არჩევნების წარმატებით დასრულებას ულოცავს.

როგორც გიორგი მარგველაშვილის განცხადებაშია ნათქვამი, საზოგადოებამ კიდევ ერთ მნიშვნელოვან გამოწვევას ღირსეულად უპასუხა.

“დღეს კიდევ ერთი ენერგიული ნაბიჯი გადაიდგა ქვეყნის შემდგომი წინსვლისა და განვითარებისკენ. 2012 წლის საპარლამენტო და 2013 წლის საპრეზიდენტო არჩევნების წარმატებით ჩატარების შემდეგ, ადგილობრივი თვითმმართველობის არჩევნების მშვიდობიანად და დემოკრატიულად, მაღალი საერთაშორისო სტანდარტების დონეზე ჩატარებით ჩვენ უმნიშვნელოვანესი საარჩევნო ციკლი დავასრულეთ და შეუქცევად ტრადიციად ვაქციეთ დემოკრატიული პროცესი. ამ არჩევნების მაღალ დონეზე ჩატარება თითოეული ჩვენგანის დამსახურებაა. და უმთავრესი გამარჯვება, რომელიც დღეს მოვიპოვეთ, არის ის, რომ მკაფიოდ ვაჩვენეთ ჩვენი საზოგადოების მაღალი შეგნება, წინსვლა დემოკრატიული კულტურის განვითარების მიმართულებით, ხმამაღლა განვაცხადეთ ჩვენი ურყევი გადაწყვეტილება, განუხრელად ვიაროთ დემოკრატიისა და პროგრესის გზით. გილოცავთ არჩევნების წარმატებით დასრულებას. ერთიანობას, მშვიდობასა და კეთილდღეობას ვუსურვებ ჩვენს ქვეყანას”, – ნათქვამია პრეზიდენტის განცხადებაში.

გიორგი მარგველაშვილი დარწმუნებულია, რომ “ჩვენი ხალხი მალე მოიმკის ამ ღირსეულ ნაბიჯთა სასიკეთო შედეგებს”.

16.06.14