საქართველოს ჯანდაცვის მინისტრ დავით სერგეენკოს განცხადებით, ბოლო პერიოდში, საქართველოს პრეზიდენტ გიორგი მარგველაშვილთან საქმიანი და პიროვნული ურთიერთობა არ შეცვლილა. ამის შესახებ დავით სერგეენკომ დღეს გამართულ ბრიფინგზე განაცხადა.
მინისტრი პრეზიდენტის ყოფილი მრჩევლის ვანო მაჭავარიანის კომენტარს გამოეხმაურა, რომლის თანახმადაც, ბიძინა ივანიშვილის განცახდების შემდეგ მთავრობამ პრეზიდენტისგან გარკვეული დინსტანცია დაიჭირა.
დავით სერგეენკოს განცხადებით, არანაირ განცხადებას არანაირი გავლენა საქართველოს პრეზიდენტთან არ ჰქონია. მისივე ინფორმაციით, გიორგი მარგველაშვილთან ბოლო შეხვედრა დაახლოებით ერთი თვის წინ პრეზიდენტის რეზიდენციაში ჰქონდა, როდესაც საპატრიარქოს ეგიდით გამოფენა ჩატარდა.
“თუმცა ცალსახად გიდასტურებთ, რომ არანაირ განცხადებას საქართველოს პრეზიდენტთან ურთიერთობაში, მითუმეტეს დისტანცირებაზე არ უქონია გავლენა. ის არის საქართველოს პრეზიდენტი, რომელსაც საქართველოს ყველა მოქალაქე ჩემი ჩათვლით პატივს სცემს და ჩვენი ურთიერთობა, როგორც საქმიანი, ასევე პიროვნული არ შეცვლილა ბოლო პერიოდში”, – აღნიშნა დავით სერგეენკომ.
მისივე თქმით, დისტანცირებისა და ცვლილებების ილუზია გაჩნდა, რადგან გასული წლის შემოდგომიდან საქართველოს ქვეყნის მართვა გადავიდა ახალ კონსტიტუციურ მოდელზე, სადაც პრეზიდენტს უკვე განსხვავებული ვალდებულებები და ფუქციები აქვს.
“ჩემი აზრით, შეხედულება რომ რაღაც დისტანცირება ხდება, გამოწვეულია საკონსტიტუციო ცვლილებებით. უბრალოდ, შეიცვალა ფორმატი საქართველოს პრეზიდენტის და ის ისე აქტიურად რეალურ აღმასრულებელ საქმიანობაში აღარ ერევა და აღარ უნდა ჩაერიოს. რას დავარქმევდი ამ ურთიერთობას, ჩემი აზრით, მე დავარქმევდი სახელმწიფოებრივ და კონსტიტუციურ ფორმატში საქმიან ურთიერთობას, როგორც უნდა იყოს”, – განმარტა დავით სერგეენკომ.
ამასთან, მინისტრი გამოეხმაურა ე.წ. 4-5 მოღალატე მინისტრის თემას. დავით სერგეენკოს შეფასებით, წარმოუდგენელია მინისტრთა კაბინეტში მოღალატეების ძებნა.
ღარიბაშვილის ადგილზე მე მომინდებოდა ზოგიერთი მინისტრის შეცვლა, – ამის შესახებ საქართველოს პრეზიდენტის ყოფილმა მრჩეველმა ვანო მაჭავარიანმა “მაესტროს ცხრიანში” განაცხადა. მისივე განმარტებით, “4-5 მოღალატე მინისტრის თემა” “ჰაერიდან მოტანილი არ არის”.
“მე ვფიქრობ, რომ კოალიციას და მთავრობას აქვს ბევრი თემა გადასაწყვეტი, მათ შორის მათი ურთიერთობა ბიძინა ივანიშვილთან – მუდმივი კონსულტაციების რეჟიმი იქნება თუ არა გაგრძელებული და იქნება თუ არა კოალიცია იმ შინაარსით როგორიც დღეს არის, რადგან, შემიძლია გითხრათ, რომ 4-5 მოღალატე მინისტრის თემა ჯერ კიდევ ცოცხალია. ვფიქრობ, ღარიბაშვილს, ალბათ უნდა მინისტრების შეცვლა. მეც მის ადგილზე მომინდებოდა ზოგიერთი მინისტრის შეცვლა. მერწმუნეთ, ძალიან ბევრი რამ ვიცი, ბევრი რამ მსმენია, თავად “ქართული ოცნებიდან” ძალიან ბევრ ადამიანთან მაქვს კონტაქტი, რომელიც ჩემს ირგვლივ შექმნილ ფონს უსაფუძვლოდ მიიჩნევს. შემიძლია გითხრათ, რომ 4-5 მოღალატე მინისტრის თემა ჰაერიდან არ არის, არ ვიცი პრემიერ-მინისტრის თავში რა ხდება, მაგრამ, ის რომ მთავრობა არ არის ეფექტური, ესეც ფაქტია”, – განაცხადა ვანო მაჭავარიანმა.
19.06.14
