დღეს ერთიანი ეროვნული გამოცდების პირველი დღეა. ეროვნული გამოცდები ქართული ენისა და ლიტერატურის გამოცდით იწყება. შეფასებისა და გამოცდების ეროვნული ცენტრის ხელმძღვანელის, მაია მიმინოშვილის ინფორმაციით, 2014 წლის ეროვნული გამოცდებისათვის საგამოცდო ცენტრების რაოდენობა 19-მდე გაიზარდა.
7 საგამოცდო ცენტრი გახსნილია თბილისში, სამი საგამოცდო ცენტრი იქნება ქუთაისში, ხოლო დანარჩენ ქალაქებში იქნება თითო-თითო ცენტრი. სულ საგამოცდო ცენტრები გაიხსნება: ფოთში, ბათუმში, ზუგდიდში, ოზურგეთში, ქუთაისში, ახალციხეში, გორში, თბილისში, თელავსა და ხულოში.
“ქართული ენისა და ლიტერატურის გამოცდა ოთხ ნაკადად გაიმართება. 26-27 ივნისი გამოყოფილია ქართული ენისა და ლიტერატურისთვის, შაბათ-კვირას აბიტურიენტები დაისვენებენ, ორშაბათიდან კი დაიწყება ზოგადი უნარების ტესტირება. 16 ივლისს საგამოცდო პროცესი მთლიანად დასრულდება. ეტაპობრივად აბიტურიენტებს შეურთდებიან მაგისტრობის მსურველები, რომლებიც საგრანტო კონკურსში იღებენ მონაწილეობას და პედაგოგები, რომელთაც სურთ სასერტიფიკაციო გამოცდების ჩაბარება”, – განაცხადა მაია მიმინოშვილმა.
ამასთან, შეფასებისა და გამოცდების ეროვნული ცენტრი 2014 წლის ეროვნული გამოცდებისათვის აბიტურიენტებს სიახლეებს სთავაზობს. მიმინოშვილის თქმით, აბიტურიენტებს საშუალება აქვთ არჩევით საგნად სახვითი და გამოყენებითი ხელოვნებაც ჩააბარონ. საქართველოს ზოგადსაგანმანათლებლო დაწესებულებებში ამ საგანის სწავლება პირველი-მეცხრე კლასის ჩათვლით სავალდებულოა, დამამთავრებელ კლასებში კი არჩევით საგნად ისწავლება.
ამასთან, უცხოური ენის გამოცდას დაემატება მოსმენის ნაწილი. გამოცდაზე დაახლოებით 10 წუთი იქნება გამოყოფილი იმისათვის, რომ აბიტურიენტებმა მოისმინონ უცხო ენის ტექსტი და მის საფუძველზე გააკეთონ რვადავალებიანი სავარჯიშო, შესაბამისად, ტესტის ამ ნაწილის მაქსიმალური შეფასება იქნება 8 ქულა.
ერთიანი ეროვნული გამოცდებისათვის დარეგისტრირებულია 36 000-მდე აბიტურიენტი, პედაგოგთა სასეტირფიკაციო გამოცდისათვის 20 000-მდე აპლიკანტი, სტუდენტთა საგრანტო კონკურისათვის 4 500-მდე სტუდენტი, ხოლო საერთო სამაგისტრო გამოცდისთვის – 12 000-მდე აპლიკანტმა გაიარა რეგისტრაცია.
გარდა ამისა, ერთიან ეროვნულ გამოცდებთან დაკავშირებით შეფასებისა და გამოცდების ეროვნულ ცენტრში იხსნება მედიაცენტრი, სადაც ნებისმიერ ჟურნალისტს შესაძლებლობა ექნება ამომწურავი ინფორმაცია მიიღოს საგამოცდო პროცესის მიმდინარების შესახებ.
26.06.14
