5 ივლისს, გვიან ღამით, ბრალდებული გიორგი უგულავა სასჯელაღსრულების N8-ე დაწესებულებაში სახალხო დამცველის რწმუნებულებმა მოინახულეს, – ამის შესახებ “თბილისი თაიმსს” ომბუდსმენის აპარატოდან აცნობეს.
“ბრალდებულის განმარტებით, მოთავსებული იყო დაწესებულების საკარანტინო ნაწილის საკანში. როგორც გიორგი უგულავამ, ასევე დაწესებულების ადმინისტრაციამ განმარტა, პოლიციის ყოფილი თანამშრომლების განთავსების კორპუსში ბრალდებულის გადაყვანის მცდელობას N8-ე დაწესებულებაში მყოფ პატიმართა მხრიდან ხმაური მოჰყვა, რის შემდგომაც ის კვლავ საკარანტინო ნაწილში დააბრუნეს.
ბრალდებულმა გიორგი უგულავამ სახალხო დამცველის რწმუნებულებს განუცხადა, რომ ის უარს აცხადებდა საკვების მიღებაზე და ითხოვდა სასჯელაღსრულების N9-ე დაწესებულებაში გადაყვანას, ვინაიდან #8-ე დაწესებულებაში თავს უსაფრთხოდ არ გრძნობდა. სახალხო დამცველის რწმუნებულები გიორგი უგულავას გადაყვანის საკითხთან დაკავშირებით გაესაუბრნენ დაწესებულების დირექტორის მოადგილეს, რომელმაც თავის მხრივ დაადასტურა ბრალდებულ გიორგი უგულავას #9-ე დაწესებულებაში გადაყვანის აუცილებლობა.
როგორც #8-ე დაწესებულების დირექტორის მოადგილესთან სატელეფონო საუბრით გაირკვა, გიორგი უგულავა გამთენიისას სასჯელაღსრულების #9-ე დაწესებულებაში გადაიყვანეს.
07.07.14
Discussion about this post