საქართველოში შერჩევითი სამართალი არ არსებობს და კანონის წინაშე წარსული თუ მოქმედი ჩინოვნიკი ყველა თანასწორია , – ამის შესახებ ევროპულ და ევროატლანტიკურ სტრუქტურებთან ინტეგრაციის საკითხებში სახელმწიფო მინისტრმა ალექსი პეტრიაშვილმა დღეს ჟურნალისტებს გიგი უგულავას დაკავებასთან დაკავშირებით გაკეთებულ საერთაშორისო გამოხმაურებაზე განუცხადა.
პეტრიაშვილის თქმით, ის მიესალმება ამ დრომდე გაკეთებულ ყველა საერთაშორისო განცხადებას და მიიჩნევს, რომ ხელისუფლების ინტერესშიც არის, ეს პროცესები ჩატარდეს სამართლიანად და გამჭვირვალედ.
“მივესალმებით გიგი უგულავასთან დაკავშირებით ამ დრომდე გაკეთებულ საერთაშორისო განცხადებას და გამოხმაურებას, ყველას მივესალმებით. ჩვენს ინტერესშიც არის, რომ ეს პროცესები ჩატარდეს სამართლიანად, გამჭვირვალედ. ჩვენ მზად ვიყავით, ვართ და ვიქნებით, მომავალშიც საერთაშორისო თანამეგობრობას მივაწოდოთ სრული ინფორმაცია და ჰქონდეთ მათ შესაძლებლობა დააკვირდნენ ამ პროცესს თავიდან ბოლომდე, რათა არ ჰქონდეს არავის განცდა და აღქმა იმისა, რომ საქართველოში არსებობს რაიმე ტიპის შერჩევითი სამართალი, რადგან საქართველოში შერჩევითი სამართალი არ არსებობს და კანონის წინაშე წარსული, თუ მოქმედი ჩინოვნიკი ყველა თანასწორია”, – განაცხადა პეტრიაშვილმა.
თბილისის ყოფილი მერის გიგი უგულავას დაკავებასთან დაკავშირებით განცხადება გაავრცელა ევროკავშირის უმაღლესი წარმომადგენლის საგარეო და უსაფრთხოების პოლიტიკის საკითხებში ქეთრინ ეშტონის პრესსპიკერმა..
როგორც ევროკავშირის მიერ გავრცელებულ განცხადებაშია აღნიშნული, ევროკავშირი ყურადღებით ადევნებს თვალს გიგი უგულავას დაკავებას, რომელსაც ადგილი ჰქონდა 3 ივლისს, თბილისის აეროპორტში.
“აღვნიშნავთ, რომ გიგი უგულავა, რომელსაც შეჩერებული აქვს მერობის უფლებამოსილება, საქართველოში თვითმმართველობის არჩევნების დროს ოპოზიციის კამპანიის ხელმძღვანელია. გავიხსენებთ პრემიერ-მინისტრ ღარიბაშვილის მიერ 14 აპრილს გაკეთებულ განცხადებას საარჩევნო პერიოდის განმავლობაში ოპოზიციის წარმომადგენლების დაკავებასა და სამართლებრივ დევნაზე მორატორიუმის დაწესების თაობაზე. ევროკავშირი მოუწოდებს საქართველოს ხელისუფლებას უზრუნველყოფს სასამართლო პროცესის სრული დამოუკიდებლობა, გამჭვირვალობა და პოლიტიკური გავლენისგან თავისუფლება იმ ვალდებულებების შესაბამისად, რომელიც საქართველომ 2014 წლის 27 ივნისს ევროკავშირთან ასოცირების შეთანხმების ხელმოწერისას აიღო”, – ნათქვამია ქეთრინ ეშტონის პრესსპიკერის განცხადებაში.
07.07.14
